大市昨日勁升375點，但成交唔夠300億銀，似乎唔係太多投資者入市，實在令人擔心升勢唔能夠持久，由於估計唔到港股後市大方向，加上大昌微線（567）昨日再勁升20％，短期內獲利咁豐厚，實在忍唔住沽出食糊，但大昌微線最後仍以全日高位收市，收1.63元。
小初沽貨獲利，但個袋有錢即刻心郁搵股炒，睇番以前炒過嘅鞋股利信達（738），隻股自從上月底以每股1.10元批股集資1億銀後，不知不覺已升至1.40元的52周高位。
經紀黃話，上次利信達批股，雖然長期支持者金手指冇加碼要貨，但亦冇沽貨獲利。不過，有其他芬佬睇好利信達的大陸零售概念，憧憬可以變身成為另一隻永恩（210），所以有基金肯要貨，家陣揸住唔夠1個月，現價1.40元較批股價1.01元，有成27％升幅，計落都好和味。
慕容小初