招積域：好眼瞓呀！
侍仔：世界盃完咗好耐啦喎，你應該多咗時間瞓覺先係㗎。整杯熱咖啡醒神先啦。
菠蘿文：唔爭在幫我寫埋餐蛋治烘底。
侍仔：我噚晚睇新聞，話保方會跟祖記降落乙組喎，係咪堅㗎？
招積域：我唔多信，佢仲有大把日子，唔似廸比亞路係黃昏球員，俾我都唔會為咗義氣而捨棄足球生命，落乙組，失去好多嘢。
菠蘿文：咁又啱呀，當年費倫降落丙組，都只係得廸里維奧一個球星陪伴，始終前程大於一切。
侍仔：近幾日報紙都做得好大呀，但我只想知最終結果。
安歷卡踢兩季隨時走人
菠蘿文：你真係懶。咁你對安歷卡有無興趣？
侍仔：我對佢印象好一般，成日轉來轉去，成個歐洲球會都俾佢踢過咁滯，第日退休可以做領隊。
招積域：我覺得係佢嗰個貪錢阿哥累到佢咁，樸茨茅夫話出8.2M買佢。
侍仔：真有錢，新老細係唔同。但安歷卡都係踢兩季就走嘅貨仔，老樸留唔住佢。
菠蘿文：有時轉吓口味都好嘅，睇得多NBA都可以睇吓本地籃球，𠵱家打緊工商盃都唔錯。我噚晚入場睇港隊，個氣氛好正。
侍仔：我只識嗰個叫官秀昌嘅球員，佢真係好勁，你mark佢一定mark到自己跌低，因為佢速度太快。
招積域：聽朋友講佢好期待官秀昌對香港艾華遜，邊個係香港艾華遜？
侍仔：永倫嗰個控衞香振強囉，但係今年佢冇入選，所以等下年先睇啦。聽晚有4強戰睇，記得入場支持吓啦。（本欄逢周一至周五刊出）
文︰高洛文