無綫今屆播世界盃雖然牽起是非成籮，不過喺冠軍戰法國對意大利嗰晚嘅收視就打破晒過往紀錄。無綫前晚喺旺角搞咗個祝捷會慶祝，林尚義（阿叔）、李克勤同伍晃榮等都有出席，不過同克勤不和嘅林敏驄就未見蹤影。
還清廣告債退隱
早前有雜誌報道話克勤因為同郭可盈嘅緋聞而同女友盧淑儀擱置婚期，之後克勤力斥報道失實，仲話「當埋條底褲都告到底」。前晚阿叔笑笑口問克勤：「睇吓你條底褲當到幾多錢，夠唔夠錢打官司！」克勤即刻「禮尚往來」回敬話：「一陣話你知！」
馮仁昭問阿叔退休生活如何，佢話極之快樂，仲話還清晒之前接落嘅廣告債後，就會從此銷聲匿迹。阿叔話：「早排俾個巴士阿叔搞到頭都赤埋，離開咗個是非圈之後真係開心好多。」席間阿叔仲高興得滿場飛，周圍敬酒，更獲女工作人員獻吻㖭！
講到早前肥杏胡杏兒觸發嘅纖體商爭奪戰，前晚樂易玲話：「其實搵邊間都係睇番杏兒自己嘅意願，不過佢就話唔係咁啱修身堂囉。」
