全世界嘅大學校長都有一個共通點，就係喊窮！個個人嘅主要職責，就係四出搵人捐助，今期得米嘅係上海同濟大學，事關搵到新地旗下嘅郭氏基金，捐款700萬，設立「新鴻基地產郭氏基金同濟大學助學金」，專門資助成績好嘅窮學生，讀完四年大學課程，預計應該有400個學生受惠。
郭炳湘話，同濟今次中選，主要係學院歷史悠久，科研同學術方面嘅表現都唔錯。計埋同濟大學在內，新地已經喺內地成立咗七個助學金，中山、貴州、湖南、西北、南京及浙江大學，都先後受過資助，大約有600個家貧學生受惠。
除咗以上七個助學金之外，遲啲仲會喺復旦及西南大學成立多兩個，又會同北大合作，推行學術交流活動。照咁睇，「新地」個朵好快會傳遍全國，好過畀錢賣廣告啦！