商舖租金高企令到好多零售業都頂唔順，盈利大幅倒退，喺租金再難大幅勁升，唔減已經偷笑嘅環境，竟然仲有唔少投資者繼續大手掃舖，一啲都唔手軟。
噚日市場傳出尖沙嘴金馬倫道有兩單大手商舖成交，都係啲億億聲嘅貨。一單係金馬倫道8號地下至6樓，成交價1.4億，話買家係冠華鏡廠，賣方就幾個月賺咗五千幾萬走人。另一單就喺條街嘅中段，話作價3億㖭。
蘭西周圍挖料，市場消息都係指向其中一間華資代理行，直接去問間行，但佢哋極力否認，仲話唔知點解市場會咁傳喎。究竟係咪有呢兩單成交，同埋係邊間行做呢，真係撲朔迷離。
今年以嚟尖沙嘴確實有好多大手商舖買賣，都係話買家睇好呢區有幾項重建，包括凱悅酒店同東英大廈，到時會令人流旺上加旺，同埋政府又計劃設行人專區，對成區嘅零售市道都有幫助。難怪今年上半年嘅大手商舖成交，都係集中喺尖沙嘴區啦。除咗地舖，連全幢商廈都畀投資者掃嚟做樓上舖，最佳例子就係資本策略，總共買咗兩幢。
電郵地址：[email protected]