股市就係一個唔輕易畀人估中嘅市場。上周五晚美股散散哋，本周一開市前，好多人面青青，一般估計恒指萬六點會受到考驗。結果，前晚美股彈番上，恒指昨日砰砰聲升番375點。
股市忽然急升，升幅超過40%嘅窩輪，當然係C輪為主，少唔過50件，追唔切，心理上亦唔能夠過關。揀啲落後股，搵佢哋嘅C輪落注，可能着數啲。
和黃C輪9183：和黃（013）收70.50元，升1.6%，升幅細過恒指，揀C輪追落後，諗9183。9183今年12月聖誕前夠鐘，輪價70仙，溢價3.6%，槓桿率10.1倍（有效7.2倍），引伸波幅23.2%。賭得狼啲，揀4751，10月初夠鐘，輪價25.5仙，溢價3.9%，槓桿率27.7倍（有效14倍），引伸波幅20.8%。
中銀C輪3641：中銀（2388）收15.30元，升幅1.3%，又係慢過恒指。揀C輪3641短炒，追落後。3641今年11月初到期，輪價6.5仙，溢價2.3%，槓桿率23.5倍（有效13倍），引伸波幅18.5%。
中海油C輪4998：中海油（883）收6.35元，升2格。短炒揀相關C輪，向4998埋手。隻輪11月尾夠鐘，輪價79仙，溢價5%，槓桿率8倍（有效5.5倍），引伸波幅35%。
章盛