美國短期內再加息嘅機會減低，消息一出，西半山豪宅即時喺兩日內錄得6宗成交，反應仲快過股市，情況都算罕見。美聯西半山營業董事馮劍釗話，呢批單位唔算特別筍，但係班買家就急住入市，仲異口同聲話收到風有機會唔加息住，嗱嗱臨入市，費事遲啲業主趁勢加價。
6宗成交集中300幾萬至700幾萬嘅中價樓，涉資超過3000萬，買家以換樓客為主，原業主大部份賺錢離場。賺得最多係位於旭龢道嘅雅翠園低層B室，1450呎，以790萬賣咗，呎價5448蚊，原業主95年以525萬買入，揸咗11年勁賺265萬。至於6宗裏面，唯一一宗蝕讓嘅，係列堤頓道俊傑花園高層E室，843呎，以495萬沽出，呎價5872蚊，比原業主98年入貨價673萬，足足蝕咗178萬。