黃長興去年在「香港先生競選」中敗在高鈞賢手下，今年其胞弟黃長發終擊敗台主高鈞賢，成為香港先生，為兄長報仇。高鈞賢的fans力斥賽果不公，黃長發也被指非香港出生，欠缺代表性。在風風雨雨之中，三位當事人一起接受訪問，大談種種傳聞。
應屆香港先生黃長發現年21歲，在法國出生，回港定居已有兩年，原來他去年也有到場支持胞兄黃長發參選港男，他日前說：「雖然哥哥最後輸咗，但我覺得佢表現好好。我返咗香港兩年，朋友唔多，參選都冇諗過贏，平時都幾怕醜，只係想練大啲個膽。」
盼弟弟變成熟
拍攝當日天氣酷熱，黃長興不時為弟弟抹汗，非常細心。黃長興透露當初鼓勵弟弟參選，只是希望他能變得成熟，他說：「我五歲同家人移民法國，早幾年自己返香港，初頭父母都擔心我搵唔到工，不過我好快就喺間法國駐港嘅貿易公司度做。細佬今次參選，我都好鼓勵，希望佢將來面對任何嘢，都會有幫助。」
買樓增添動力
弟弟比賽當晚，黃長興一直在電視機前觀看，他說：「我舊年參選，當時好多人話我係大熱，搞到自己好緊張，睇番自己嘅表現的確唔係好自然，原來喺屋企睇住細佬表演，仲緊張過自己上台。」
至於當晚跳舞跣腳的高鈞賢，表示並非因不滿賽果而哭，他說：「我只係唔滿意跳舞失準，事後都同fans講比賽得失唔重要，自問已經盡咗力，希望佢哋同我一齊向前走。」雖然連任失敗，但高鈞賢已與無綫簽下八年長約，最近更與胞姊在將軍澳置業，他說：「買咗800幾呎單位，每人月供萬幾蚊，有壓力咪更加努力工作囉。」
採訪：卓美娟 攝影：葉君海
