華華從來都覺得I.T副主席盧永仁係醒目仔，勢估唔到佢跳槽快，連跳車都咁快。由17號停牌至今嘅海域化工宣布，原任公司非執董嘅盧永仁，經已喺18號辭職，睇嚟，喺海域做管理層好過做小股東，管理層話走就走，小股東一停牌就企喺度。
盧永仁10年唔夠，由香港電訊（即家吓嘅8號仔），跳去花旗銀行做賓卡，又做科網大亨，仲跳入祖國聯通嘅懷抱，仲做埋大批上市公司非執董。用咁短時間，就經歷咗人哋差不多一生嘅事。
華華噚日經過報攤，見到本乜乜企業家嘅雜誌，封面訪問海域集團副主席許浩明，大字標題話講企業管治，咁啱海域化工佢同佢阿媽海域集團就喺呢個星期一停牌至今，有通告話佢哋賬目有潛在問題喎……唔知本雜誌攞彩定贈興，銷路又會唔會受影響呢？