陳太同葉劉都辭咗官好耐，連阿董都落埋台，𠵱家唔知係有心定無意，前後腳「復出」政壇。兩位阿太以前都傳過不和，𠵱家雖然各行各路，但「不是冤家不聚頭」，前日葉劉開完「匯賢」智庫發布會，噚日陳太又喺外國記者會演講，時間真係夾到痹，不過論風頭，陳太始終勝一籌。
葉劉可能以為佢仲係官，講嘢依然cool爆，前日發表嘅偉論，圍繞經濟為主，聽到在場人士瞌晒眼瞓，反而陳太施展四萬本領，全程保持笑容，仲大講民主同普選，成個港版「昂山素姬」咁，聽到八方鬼咁有共鳴，怪唔得佢唔使好似葉劉咁廣發英雄帖，演講午餐席位19分鐘內book滿（肥彭晚宴40分鐘book滿），今勻葉劉風頭真係輸晒。
葉太前日隻字不提陳太，唔知係咪仲介意當年喺陳太手下，不過陳太就好大方，雖然講明唔會加入匯賢，但都補番句"IwishRegina（葉劉洋名）success."葉劉今勻真係輸埋面子。陳太要離開，成班記者企住樓梯都要向陳太拍掌致敬，莫講話葉劉恨都唔會恨到，煲呔亦係一樣，呢種咪叫得民心囉。