八方仲記得煲呔上任時，話過政府冇官商勾結，政府唔會偏幫地產商，但係《蘋果》娛樂版今日有單好料，影到賭王何鴻燊同四太、規劃地政局局長孫明揚兩公婆，兩pair人前晚前後腳入富豪飯堂灣仔福臨門食晚飯。
大家唔好忘記賭王仲有另一個身份，就係地產建設商會會長，若果佢哋真係friend到咁兩家人一齊食飯，咁就難免令人諗，為乜有嘢唔日光日白喺辦公室傾，要去富豪飯堂食住鮑魚傾？
類似飯局成日有，讀者唔善忘嘅話，應記得舊年11月嘉亨灣事件鬧到滿城風雨，煲呔曾同孫公就俾《蘋果》娛樂版同事，影到同成班大地產商去田北俊間豪宅食大閘蟹宴，早輪何鴻燊贏馬，孫公又去賀。特區上下親疏有別，完全唔避嫌。對於孫公同賭王出現福臨門，政府發言人就話，局長嘅私人活動，不作回應。但到咗深夜，孫公嘅新聞秘書就話佢兩個冇一齊食飯。