毓民唔做名嘴，轉行賣牛肉麵，𠵱家又趁住書展呢個黃金檔期，落手落腳賣新書《歷史幾串都有》，仲送親筆簽名同海報，連佢太座都着到靚一靚現身支持，唔少「粉絲」見到偶像，都攞部手機同佢影相。
冇見毓民一排，佢剪咗個短髮，仲瘦咗成個碼，不過𠵱然冇改佢嘅名嘴本色，仲同八方講話：「香港𠵱家俾兩個女人政治性騷擾，一個係陳太，另一個係葉劉。」
何解？佢話陳太成日同人講「見步行步」，都唔知佢想點行；葉劉三年前搞23條立法，置香港於死地，仲爆發7.1遊行，𠵱家又突然返嚟話搞番民主，更加係唔知佢搞邊科咁話。
用「江山易改、本性難移」嚟形容毓民真係好貼切，佢𠵱家冇得開咪，就用支筆借古諷今，仲暗嘲煲呔好似古代嘅奴才一樣，要靠「北京爺們」嘅欽點。
本書噚日新鮮出爐，八方覺得兼備歷史政治知識，好適合學生哥睇。原來嚟緊毓民喺書展仲有幾場簽書會，為咗本書，佢都真係瞓晒身宣傳。