車路士嘅領隊摩連奴不嬲性格牙擦擦，成日喺度也文也武話隊波點勁點勁。不過最近呢位葡萄牙教頭轉晒死性，話新球季嘅社區盾同季初幾場聯賽，車路士都唔可以排出強陣應戰，仲話曼聯嘅備戰工夫好過自己隊波多多聲；由摩連奴把口講出啲咁嘅說話，我求大俠始終都唔係好慣。
車路士之所以季初唔可以排強陣，同佢哋隊中有多名球員要征戰今屆世盃有關，話晒球員都係人，要休息吓都好應該。
怕猛將踢完世盃腳軟
不過摩連奴𠵱家手頭上嘅球員可謂猛將如雲，先有波歷克加盟，再撬走AC嘅舒夫真高，實力仲勁過上季；而且摩連奴話仲爭1個頂級後衞加盟，組軍先大功告成。摩帥現時最想簽嘅係祖雲達斯嘅森保達同阿仙奴嘅艾殊利高爾；不過森保達對車仔冇乜興趣，寧願選擇加盟AC米蘭，而阿仙奴就唔肯放艾殊利高爾。不過話時話，森保達同艾殊利高爾都係「世盃球員」，簽佢哋返嚟季初都唔用得㗎喎，咪又會影響摩帥備戰？
其實曼聯嗰邊之所以季前備戰工夫好，原因好簡單，係佢哋根本沿用緊舊有班底打熱身賽，默契當然會好啲。計我求大俠話，實情係摩連奴喺度「潤」緊阿費Sir買唔到人啫，嗰啲讚美曼聯備戰工夫好嘅說話，咪又係佢牙擦理論之一。
摩連奴「高」即係「高」，講出嚟嘅嘢都零舍有深度，門面說話講到車仔唔夠曼聯個陣完整，其實暗地裏寸緊費Sir，不過呢啲招數瞞唔過我求大俠喎。