先後與殼王陳國強傳緋聞的郭羨妮和葉璇昨日不約而同出席公開活動，因偷會馬德鐘而成大輸家的郭羨妮，為𢱑銀即使暴瘦也要穿bratop露肋骨及有粒粒印的肚皮；反觀傳被殼王翻撻的葉璇為新書舉行簽名會，一身六位數字珠光寶氣晒行頭，由頭到腳360°贏晒。
郭羨妮和葉璇這兩位先後與殼王陳國強傳緋聞的女人，近期的遭遇真箇峯迴路轉。殼王先在上海被葉璇一舞磨爆，事後傳他不滿對方太高調而火速疏離，轉移目標寵幸郭羨妮，更讓她擔任新片女主角，但郭羨妮卻被踢爆暗撻有婦之夫馬德鐘，令扯火殼王一腳伸開她，寧願與葉璇重新開始。昨日郭羨妮和葉璇各自出席公開活動，失勢郭羨妮神情憔悴，又乾又瘦；得寵葉璇神采飛揚，珠光寶氣，輸家贏家一目瞭然。
全無狀態
人枯瘦肚有摺痕
由天堂跌落地獄的郭羨妮，昨天到九龍灣出席瘦身產品活動，為冧廣告商，明知暴瘦也硬着頭皮穿bratop，現場見她除胸部縮水外，更胸底現肋骨，肚臍露摺痕，略下垂的肚皮還現出粒粒印。
對於有報道指馬德鐘到郭羨妮香閨過夜，她昨解畫說：「佢冇去我屋企，我係喺西貢先車埋佢，車朋友好正常，我同佢根本冇嘢，咁對我唔公平，對佢家人又唔公平，我揀男朋友唔會揀有婦之夫，我唔想第時結咗婚有報應就唔好啦。」她又稱身邊雖有追求者，但會選擇單身男士。
問郭羨妮會否考慮選擇離婚男士做對象，她即說：「冇咁好，會扣分，仲有我唔使有錢，因為我唔使『殼』嘅。」此言等同再次表態與殼王割蓆，但問郭羨妮有關葉璇寸她失寵一事，她則拒作回應，同時又否認自己患厭食症，而完成活動後，她即坐保母車到落馬洲直返內地，為生計繼續頻撲𢱑銀。
珠光寶氣
行頭逾10萬夠豪
另一邊廂，葉璇昨為新書《上善若水璇攻略》到灣仔會展舉辦簽名會，容光煥發的葉璇為配合其才女身份，特別穿着DianeVonFurstenberg粉紅戰衣，戴FranckMuller手錶及Swarvoski耳環，全身上下價值逾六位數字。她到場後先在會展行人天橋舉行簽名會，雖然fans僅得20多名，但之後轉場到書展攤位及君悅酒店，四處出巡晒命。問葉璇會否在書內提及與殼王的一舞情仇？她笑說：「想知自己買嚟睇，但我係從來冇聯絡佢，亦都唔識佢！」對有報道指殼王曾送葉璇豪宅，又傳她為殼王口中放料人，她說：「經理人答咗啦，同一件事唔使答兩次。」
採訪：王崇穎、何永寧
攝影：葉君海、陳慧安
