32歲的名模周汶錡出道至今面貌起巨變，隨着其年齡的增長，美貌亦與日俱增，鼻樑愈來愈高挺，下巴也愈來愈兜，她昨日為第四本新書舉行簽名會，極力否認曾經整容，表示那是箍牙的成果，還說：「阿媽生成都冇法。」
周汶錡昨日傍晚6時於會展為新作《MyDreamWeddingII》及《MyStyleGuide─香港之旅（九龍新界篇）》舉行簽書會，她於6時20分才到達，還特意走到賣書攤位看銷售情況，可能正值下班時間，其簽書會吸引約半百人排隊，圍觀的人也多，其中以年輕男士居多。
下巴不嬲都兜
周汶錡以往出書都招風雨，昨日卻天氣晴朗，她笑說：「今日雨過天青，不過好多嘢贈興，我都係聽人講㗎咋，得啖笑啦。」談到整容疑雲，其樣子一年靚過一年，下巴近腮位似有凹凸疤痕，周汶錡說：「嗰日我戴咗水晶耳環，陰影打落塊面度之嘛，咁都話我整容好無聊，冇理由整呢啲位，自殺就呢度。我笑就話我嘴薄整過，我下巴不嬲都咁兜，阿媽生成都冇法，聽咗得啖笑。」
周汶錡竟突然激動地伸長脖子，問記者覺得她有沒有整容，然後又謂：「箍牙係咁㗎啦，人愈大變得愈靚，變靚咗我唔介意呀，做咗都有疤就係失敗啦，點可以企喺度？」周汶錡又謂會保留追究權利，她結束訪問前竟說：「我係男人呀，咁大個秘密，知唔知呀？」
否認槍手代筆
至於有雜誌指周汶錡新書是找槍手代筆，她也否認說：「本書係分享心得，寫嘅係我自己嘅意思，我唔係小說作者，書中有好多係我做訪問嘅記錄，叫人係寫唔到㗎，人哋冇理由知我點諗。」她又謂不打算公開手稿。
此外，有雜誌報道指鄺美雲、鍾鎮濤、黃淑儀及查小欣等都有打人胎素回春的習慣，正於澳洲放假的查小欣昨日特地致電商台節目作回應，她說：「回唔回到春我就唔知，我的確去試過，黃淑儀做代言人，佢話好好，話鄺美雲都有打，我咪試吓囉，不過我冇打晒全部，做啲唔做啲，不過我畀錢買佢隻番梘。」
採訪：何永寧
攝影：葉君海
