香港快餐文化，自小已根深柢固！不過快餐食物營養不均衡，而且煎炸居多；廿四孝媽媽阿May為咗怕對仔女變肥仔肥妹，絞盡腦汁，終於想出幾個改良版快餐菜式，少油少鹽，加上菜肉比例均衡，食得健康之餘，最滿足都係囝囝囡囡讚話好味過出街食！
記者：謝翠玲
攝影：何家亮、陳盛臣
Model：May、Cheri、Ken（Salvador）
改良版麥樂雞 豆腐加雞更鬆化
價錢：$26/30塊
需時：20分鐘
為食Ken每次經過麥記便會使出「纏功」，停在門口唔肯走，誓要扭到媽咪買麥樂雞先肯罷休。但高脂肪的油炸食物間中食吓唔錯，多食就差啲，為了逗寶貝仔開心，便出「茅招」，用雞肉混入豆腐和雜豆，仲諗到以焗代炸，令囝囝食得開心又健康。
材料：豆腐1磚、雞蛋200克、雞肉200克、蛋1隻、雜豆50克、麵包糠及麵粉各適量、亁紫蘇半茶匙、黑胡椒、鹽、橄欖油各少許
雞蛋$5/8隻（a）
免治牛肉$8.8/包（a）
急凍雜豆$8/磅（a）
簡易法
1.雞蛋豆腐絞碎，跟雞肉和雜豆拌勻，加入鹽、黑胡椒和亁紫蘇；
2.搓成小塊狀，沾上麵粉、蛋汁及麵包糠；
3.焗盤墊錫紙、掃油，排上雞件，再掃油；焗爐預熱，230℃焗30分鐘即成。
貼士：如要炸雞件，最好將雞件放入雪櫃下格雪2小時，炸起來便不容易散開。
蜜桃焗豬扒飯 甜脆更勝街版
價錢：$32/3人
需時：15分鐘（未計焗時間）
小朋友唔稀罕鮑參翅肚，對Cheri同Ken香噴噴焗豬扒飯至係最愛。逢周末一家大細去完XX樂園玩，指定節目必定係去大家樂食焗豬扒飯。有次May整蠱一對仔女，同佢哋講今晚無得出街食焗飯，搞到兩個扁晒嘴；忽然由焗爐捧出兩盤香甜的蜜桃焗飯，𠱁得佢哋即刻拍手叫好，仲話以後指定要食媽咪愛心焗飯㖭
材料：細豬扒8件、番茄3個、洋葱1個、蜜桃1罐、白飯3碗、蛋2隻、豉油2湯匙、糖及酒各1茶匙、生粉2茶匙、茄汁2湯匙、水2碗、鹽、芝士粉各適量
豬扒$26/斤（a）
番茄$4.8/斤（a）
洋葱$4.8/斤（a）
簡易法
1.豬扒兩面拍鬆，加豉油、糖、酒及生粉略醃，煎熟；
2.燒紅鑊、炒蛋，下白飯和鹽炒勻，盛入碗中；
3.爆香洋葱，加入番茄、下水，以茄汁、糖和鹽調味，再加入生粉水調杰醬汁，豬扒回鑊；
4.豬扒跟蜜桃相隔鋪飯面，淋上醬汁、芝士粉，以230℃焗20分鐘。
貼士：以淺而闊的焗盤來焗飯，醬汁較易滲底，可做到飯入味而豬扒脆的效果。
吉野家牛肉 雙菇最夠香
價錢：$32/3人
需時：12分鐘
囡囡Cheri每次學完琴回家，都拉住May去食吉野家牛肉飯，因為同學仔同佢講，話啲牛肉香，湯汁甜，非試不可！不過May覺得小朋友應該要食得均衡，便想到將牛肉加入金菇和冬菇同煮，𠵱家搞到連同學仔都搵藉口跟埋Cheri回家食午飯！
材料：牛肉片10片、金菇100克、鮮冬菇10隻、洋葱半個、日本淡豉油2湯匙、味醂2湯匙、糖1茶匙、水1碗、日本酸薑適量
牛肉片$29.9/包（c）
金菇$5.9/100克（c）
鮮冬菇$5.9/包（c）
簡易法
1.洋葱切幼條，冬菇切片，金菇去根洗淨備用；
2.爆香洋葱和冬菇，加入豉油、味醂、水和糖煮滾；
3.下金菇和牛肉片，至牛肉轉色即可連汁上碟，食時放入酸薑。
貼士：如果沒有日本淡豉油，可用魚生豉油取代，但份量要減少半湯匙，因味道較鹹。
KFC蘑菇醬 配蝦啱送飯
價錢：$15/3人
需時：10分鐘
材料：蘑菇1罐、洋葱碎1湯匙、蒜茸1茶匙、牛油1茶匙、蝦200克、燒汁2湯匙、水2碗、雞粉4茶匙、鹽及糖適量
蘑菇$5.9/包（c）
牛油$19.9/500克（b）
急凍蝦仁$15/150克（c）
簡易法
1.凍鑊下牛油，爆香洋葱和蒜茸，加入以雞粉醃過的蝦；
2.下蘑菇片，加入水和燒汁煮滾至收杰，最後以鹽和糖調味。
貼士：蘑菇醬的香味來自味道濃郁的燒汁，燒汁可在大型超市找到。
周打薯仔湯 春卷皮面脆卜卜
價錢：$20/4人
需時：20分鐘（不計焗的時間）
材料：春卷皮4張、薯仔1個、脫脂奶250毫升、蝦6隻、蘑菇3粒、麵粉2湯匙、牛油1湯匙、水3碗、鹽、橄欖油各適量
薯仔$6/斤（a）
脫脂牛奶$6.1/236毫升（b）
簡易法
1.薯仔切粒烚腍，壓成茸；蘑菇和蝦切粒備用；
2.下牛油炒麵粉至金黃色，慢慢加入脫脂奶和水，煮滾，加入薯茸、蝦、鹽和蘑菇；
3.將湯舀入碗中，碗邊塗上以少許麵粉開水而成的麵糊，蓋上春卷皮，薄塗一層油，以200℃焗20分鐘即可。
貼士：如果有攪拌機，可以將湯連同薯仔一起打成茸，口感會較幼滑。
（a）鰂魚涌英皇道太平街市
（b）鰂魚涌英皇道東匯中心百佳超級市場
（c）太古康怡廣場吉之島