黃亞細 新加坡著名肉骨茶店老闆
我真係估唔到，香港特首曾蔭權來唔到呢度食肉骨茶，竟然搞出咁多新聞。噚日仲有個香港官員（香港駐新加坡經貿辦事處處長林錦光）嚟搵我飲茶，話我知曾特首冇嬲到，希望我唔好誤會！呢件事之後，日日都有記者搵我，生意更加多都做唔切，所以好難同你再傾多兩句！
多成點？我以前每日訂一百斤排骨，但呢兩日我訂一百幾廿斤都未夠，下晝一點幾已經賣晒，你都見啦，生意咁好真係意外收穫！曾特首下次嚟，記住一點前到，如果唔係就食唔到！
搞到曾特首咁掃興，其實我都要講聲對唔住，我都好想招待特首，難得佢係香港嘅貴賓，我個仔都在香港做事，佢上星期六返來同我食飯，跟住我就去咗馬來亞唞唞，返到嚟先知發生乜事。但就算我喺度睇舖，都好難特別招呼曾特首，啲夥計個個凌晨四點幾開工，我真係唔忍心叫佢哋做埋夜晚。我已經寫咗信畀曾特首道歉，希望佢唔好介意。
………………………………
香港同我都幾有關係，唔止你一個，之前都有人「嬲」我去香港開分店，但我冇去。點解？我喺新加坡都做唔切，又邊有力去香港開分店？不過我都幾鍾意香港，我個仔喺香港中銀返工，我每年都會去一次。香港最好食係燒鵝，我啲肉骨茶又邊度比得上？以前我每次去香港，都會去鏞記買燒鵝帶返新加坡，但後來新加坡機場唔畀帶。雖然咁好食，但價錢就好貴，如果我冇記錯，外賣都要成360港紙一隻！
我係粗人，讀到五年班就冇書讀，好多嘢都唔識，廣東話都可以講，但講潮州話就最好。我23歲結婚，今年71歲，結咗婚48年，老婆同我朝朝一齊開工。佢唔識煮肉骨茶唔緊要，最緊要係佢識得幫我計數同收錢！唔經唔覺做咗四十幾年，到𠵱家仲日日落舖，幫手裝飯、煲湯、招呼客人。我以前想60歲退休，但到嗰日見身體仲幾好，又繼續做落去，我現在都唔諗退休，到真係做唔到時先算啦！
………………………………
你睇到我舖頭有我同馬英九合照，佢今年五月來過，嗰日朝早七點鐘就嚟。唔止台灣人，香港人都好鍾意嚟，特別係呢兩日，我喺舖頭聽多咗好多廣東話。好多人「嬲」我開多間，但我都冇答應，因為真係唔夠人手。就算請人教佢煮，睇怕學識咗就會自立門戶，唔會幫你打工。當然我14個夥計個個都好好，佢哋為咗間舖，一年連續11個月日日開工，淨係年初四前一個月放大假，等佢哋有時間辦年貨。我每年都會同佢哋一齊去旅行，機票、酒店、三餐全部我包，去香港、去澳洲、去泰國、去日本，答謝佢哋咁勤力！
咁多年我都冇將肉骨茶煮法教人，我又唔太介意會失傳，反正我嘅肉骨茶其實好普通。係喎，你話香港就快會抽銷售稅，我都成日去香港食嘢，我梗係唔贊成啦！
撰文、攝影：莊曉陽