知道學校法團註冊成為法律新產品之後，左丁山問律師Ｔ：「乜呢件產品有得做咩？」律師Ｔ話：「呢類屬於one-off產品，全港中小學要註冊成為法團嘅，總會有五六百間起碼，計六百間啦，每間註冊收五至七萬，算六萬嘞，市場就有三千六百萬元律師費等律師攞。唔算大，但好過冇，𠵱家世界唔係好好，搶得就搶啦。」
記得最近睇《金融時報》，話一間Cityfirm（倫敦之內講City，指金融界，aCityfirm就係一間專做金融界生意嘅大律師行。）叫做Allen&Overy，上個財政年度賺大錢，有四十億港元之多，因多得領匯與中國銀行上市之故。做律師，入到呢啲大行，就唔使驚住去學校推銷自己搵啲濕碎錢啦。
律師Ｔ鬧左丁山：「唓，做賓架，個個可以成為蒲偉士、龐約翰咩？我有世姪女喺高盛攞六十個月花紅，即刻夠佢交首期喺半山區買屋，亦有世姪喺星期六下午仍然開工，企喺銀行分行門口推銷按揭產品，世姪見到世姪女，唔使做人呀？總之各有各做。嗱，特區政府有政策益我哋，學校法團註冊唔算得係大生意，但律師可以做證婚人，長做長有，呢項新產品先至值得我哋去搶。」
據律師Ｔ講，現在香港人結婚，唔使去婚姻註冊處，搵個合資格證婚人，去邊度結婚都得。律師向一對新人宣讀標準結婚誓詞，易過食生菜，每次證婚，可收三、四千，賺得不費吹灰之力。小數怕長計，算佢一年有四萬對新人結婚，一半新婚夫婦搵律師證婚，總生意額就有六千萬，而且係細水長流㖭，唔怪得佢話做婚姻服務提供者，話唔定包辦埋結婚、離婚，有排做。
目前去邊度結婚最受歡迎？律師Ｔ話係四季酒店，一來全海景，二來有四層宴會廳房可以一齊舉行婚禮，生意可以做多啲，最受律師及新婚夫婦歡迎。有海景嘅商場、會所，陸續加入競爭新婚市場，一啲都唔奇。