有瘦身界神話之稱嘅欣宜，前年開始用咗十個月時間努力減磅，由230磅成功減到得番140磅，變成為標準索女。但近日有雜誌喺加拿大拍到欣宜嘅近照，話佢翻脹到200磅，肥腩現形，神話破滅，搞到修身堂老闆張玉珊急急澄清話欣宜冇翻脹，仲叫佢寄啲相返香港力證身形冇變㖭。
腰帶難掩贅肉
不過紙始終包唔住火，前日欣宜靜雞雞返港，同媽咪沈殿霞去咗演藝學院探班，見吓忙於綵排舞台劇《天之驕子》嘅爹哋鄭少秋。馮仁昭見欣宜着咗件白色衫，腰間綁住條黑色腰帶遮遮掩掩，但仍然隱隱見到嗰條士啤胎，面珠仔都脹咗唔少，估計佢𠵱家嘅體重絕唔只佢哋所講嘅140磅。
雖然圓潤咗唔少，但喺秋官眼中欣宜仍然係小公主，尤其係當佢忙緊綵排嗰陣突然見到乖女現身、仲大聲嗌：「爹哋好戲！」令秋官開心到飛起。秋官話早兩晚先傾完電話，欣宜話自己唔得閒返港，原來只係一個美麗嘅謊言，欣宜呢次認真鬼馬！
