今個禮拜真係熱鬧，前日葉太成立智庫，昨日陳太成立小組，今晚肥彭又由泰國飛埋嚟趁熱鬧，五六日一節目一個接一個，肯定搶盡鏡頭，唔怪得強政勵治嘅煲呔要避一避鋒頭，走去同小朋友講古仔。
肥彭今次嚟，當然唔係同兩個阿太有關，只係佢上次本《NotQuitetheDiplomat》實在喺香港賣得太好，今次出平裝版本，冇理由唔搵多一筆。所以呢位末代港督乜都制，明日上晝去和記大廈Bloomsbury，後日上晝去國金Dymocks，大後日中午去太子大廈Dymocks，下書仲過埋海去美孚西鐵站商務，總之你肯買書我肯簽名，一定唔會令香港班老友記失望。至於去美商會食晏、去英國文化協會演講呢類例牌活動亦唔少得，星期六上晝十點，仲會去埋迫到爆嘅書展㖭！
全家上下都惹人歡喜
咁肥彭又真係值得香港人懷念，特別係經過過去八年，經過董特首同曾特首嘅朝7晚11同親疏有別之後，大家先至明白，點解人家三個女咁得人鍾意，兩隻狗咁惹人歡喜；點解人哋去泰昌食蛋撻賓主都咁開心，而我哋去黃亞細飲肉骨茶就搞到爆發外交風波！
政治家唔係講吓就做得。政治公關，更加唔係人人識做。想學嘢，其實最好就係去問肥彭。記得當年肥彭被魯平大鬧係千古罪人，佢同麥奇連講：我想去見吓市民。跟住佢落區，電視機前，播出香港市民對佢熱情呼喊同揮手。要回應京官嘅攻擊，有乜嘢好過呢個鏡頭？
事實呢個罪人，後來又成為北京上賓，安排埋佢去黨校演講。不過，佢都好慎言，上次嚟冇乜點講政治。今次會唔會講？書商PageOne個負責人昨日就笑笑口話到時肥彭梗會答問題，「可能會有人問政治問題啩！」咁梗有，八方就係其中一個，喺佢去上海之前，實要問吓佢點睇普選、點睇下一屆特首人選、同埋陳太葉太邊個叻啦。