未知幾時開幕嘅東涌纜車昂坪360，自上個月有乘客半天吊後就日日俾人插，作為昂坪360唯一一位公關、傳訊經理莫穎思（Wings），亦少不免成為箭靶。唔知係咪壓力太大，Wings噚日通知大家，做埋下個月四號就拜拜喇！
佢語帶欷歔咁同八方講，做嘢最緊要開心同有發展空間，而喺昂坪360短短半年，好似上咗個intensivecourse咁，乜危機一次過處理晒。點解唔好頭好尾，等埋開幕先走？佢就語帶雙關咁話，驚自己等唔切喎。
至於喺邊度謀高就、係咪做番老本行酒店，Wings就死都唔講，淨係話老闆高德偉𠵱家請緊人，希望咁多位行家將來對佢位接班人手下留情。八方喺度祝佢前程似錦！