啱啱宣布留任兩年嘅科技大學校長朱經武，一向平易近人，點知噚日同傳媒茶敍時講開，原來佢有時都會故意教訓吓一啲自以為是嘅人，同埋走堂走到連佢都唔認得嘅學生。
朱校長當年喺美國做研究，試過有一次，一個選咗佢堂課但從來唔上堂嘅學生，到朱校長嘅實驗室搵佢，於是朱校長就問佢：「你搵邊個？」個學生仲懵盛盛話：「我搵PaulChu。」朱校長聽到就即刻同佢開玩笑：「我無見過佢。」呢個學生儍儍哋走咗，見完朱經武都唔知朱經武係邊個，證明平日唔上堂，連老師都唔識！
除咗教訓曳學生外，朱校長又話，曾經有個好沙塵嘅鬼佬教授到佢嘅實驗室搵佢，對方行起路時仲左搖右擺，佢又係見到朱經武問朱經武喺邊，朱校長見佢咁沙塵，於是話自己係研究生，「朱經武」未返到實驗室，結果呢個教授行嚟行去都以為搵唔到朱經武，失望而回。