連續幾日氣溫超過30℃，出街一身大汗，熱到妝都溶。走過人頭湧湧嘅女人街，忽見熊熊烈火，原來係日本鐵板燒！食客看到拍爛手掌，大熱天時對住個火都咁High？High！呢團火正正係鐵板燒賣點，食客們都話食鐵板燒要坐Bar枱，歎美食之餘又可以當睇Show！記者︰方綺君 攝影︰陳偉強
模特兒︰Carrie&中島明（Salvador）
師傅藝高人膽大
說鐵板燒是藝高人膽大的專業，絕對無錯！師傅兩手拿着鏟刀，用純熟手勢在鐵板上扒扒撥撥，清脆刀聲在鐵板和食物間游走，偶爾轉動幾次胡椒樽，最尾飛快在食物上淋白蘭地，蓬的一聲，大團火舌湧出，雖一閃即逝，但圍觀食客已嘩的一聲喊了出來……我就是喜歡吃鐵板燒，喜歡聞那股惹味的燒烤味，喜歡欣賞師傅純熟的燒菜手勢。幕幕精采場面，每晚都會在「和井」上演，老闆兼總廚Ben每晚也樂此不彼，玩火娛樂食客，做得鐵板燒，預了被火辣，最傷一次是怎樣的？「我又未試過辣親喎，試過俾鏟刀割親就有，不過有同事就試過玩得太大火，唔小心俾火燒晒啲手毛！」這間女人街人龍舖，除有一眾玩火了得的師傅坐鎮外，店內海鮮日日清，還率先引入鐵板燒壽司、鐵板燒薄餅，如此多諗頭，難怪討到食客歡心。
Ben入行13年，先後在熊太郎、三川、松阪和水車屋等高級日本料理店工作，從學徒一路做到師傅級，其他鐵板師傅們也各有各Fans，客人訂位時會指定要邊位師傅Serve㗎。
1.鐵板鵝肝薄餅$98
Ben最新創作︰「我諗全香港我首創啦。」自調薄餅粉漿，把用鐵板煎好的法國鵝肝鋪在煎得脆卜卜的薄餅上，配南瓜、紅蘿蔔、洋葱、冬菇、靈芝菇絲等配料，再淋上鵝肝汁，好香！
2.蘇格蘭蟶子王 每隻$48
Ben說：「講蟶子，蘇格蘭蟶子最鮮甜好食。」烹調方法好簡單，倒少許水落鐵板，用鑊蓋蓋着蟶子，單靠蒸氣蒸熟蟶子，最後淋上溶牛油，保留鮮甜味。
3.美國珍寶蠔 2隻$42
生蠔是酒店用的高級貨，大啖一咬肉汁四溢，配上爆得香噴噴的煙肉和洋葱粒，色香味俱全。
4.美國安格斯牛肉$128
為求原汁原味，鐵板燒食物從不調味，牛肉亦不例外，一淋白蘭地再點火，迅速鎖住肉汁，連同煎香的蒜片入口，好吃。
食客有Say
姚生︰「今日同囝囝賀生日，特登訂Bar枱位。」樂樂︰「我叫咗隻龍蝦，睇住師傅整熟佢，好大火好得意。」
姚太︰「同小朋友食鐵板燒，等佢哋有嘢睇吓唔會叫悶。」卓芝︰「頭先好大火呀，好勁呀。」
梁小姐︰「我嚟親都一定要坐Bar枱睇師傅表演。」梁太︰「第一次食鐵板燒，有得睇有得食，好得意。」
搵食攻略
D.和井鐵板燒專門店（31881786）
地址︰旺角通菜街78號地下
營業時間︰星期一至五12:00nn-3:00pm，6:00pm-12:00mn，星期六及日12:00nn-4:00pm，6:00pm-12:00mn
座位︰16個鐵板燒Bar枱位、堂座30個，想坐Bar要預早下午訂位
最好賣︰蟶子王，日日入貨日日清，手快有手慢無
抵食夾大件
「龜井」開業近13年，亦是女人街受歡迎的鐵板燒店舖之一。能夠屹立不倒多得熟客支持，價錢平是賣點之一，很多人認為鐵板燒價錢貴，不過「龜井」價錢卻大眾化，午飯市套餐大多$50有找，晚市二人龍蝦套餐$298。老實，我有懷疑過店方將價就貨，不過上碟的是澳洲龍蝦，吃到的是啖啖滋味，登時放下心頭大石。
美國薄燒牛肉鐵板餐$49
最新推出午市套餐，有齊美國薄燒牛肉、鐵板銀鱈魚骨腩或鐵板三文魚骨腩二選一、野菜沙律，和風炒雜菜、活蜆味噌汁加白飯，$50有找確係抵。
鐵板生猛龍蝦套餐 2人$298
店中有魚缸存養12両重澳洲龍蝦，活生生煎熟夠鮮甜，套餐還有龍脷柳、金菇牛肉卷、沙律、黃金炒飯、炒雜菜，平到笑。
鵝肝卷$65
用鐵板煎香的鵝肝，再包成壽司，加上芒果肉後有意想不到的甜味，而外層的青瓜片和咖喱汁一濃一淡亦充滿特色。
鐵板牛柳$32
有定食供應，生熟程度可自行選擇，師傅煎得外皮香脆，略帶少許焦顯得更惹味，內層香軟充滿肉汁，兩種不同的口感。
搵食攻略
E.龜井鐵板燒‧日本料理﹙27820818﹚
地址︰旺角通菜街威達商業大廈1K-1L地下
營業時間︰星期一至五12:00mm-3:00pm，6:00pm-12:00mn，星期六及日12:00mm-3:30pm，6:00pm-12:00mn
座位︰26個鐵板燒座位，堂座約48個
最好賣︰鐵板生猛龍蝦套餐
有着數︰匯豐信用卡9折優惠（適用於星期一至五晚市）
