侍仔：我最憎俾人管住晒！鍾意做咩咪做咩囉，我都咁大個人啦，自己知自己事！
菠蘿文：做咩事咁火爆？因為女友唔畀你講粗口？
招積域：有人管即係有人關心你呀儍仔！
侍仔：唔係覺得煩，而係咁小嘅事都要管埋一份。我阿媽成日話同外國人拍拖唔好，又話溝通唔到，又話要我離開佢。
菠蘿文：外國球員成日都有異國戀㗎啦，你同阿媽多啲溝通啦侍仔，如果唔係就好似嗰個醫生阿爸咁管住個女，又唔畀佢拍拖㗎啦。
招積域：佢話個女嘅男友令佢荒廢學業，所以咪告個女嘅男友。𠵱家又話大團圓結局，老竇話知錯啦。
菠蘿文：侍仔，你阿媽都係為你好，唔好咁燥底啦，開口埋口都係粗口。
侍仔：咁咪唔講囉！如果雲佬去皇馬，你哋覺得點樣？雲佬搭肥哨？
招積域：哈！一對不同時間曾效力PSV嘅前鋒重聚，但我總覺得年紀大就唔好買，踢得1、2年就要賤賣。仲有佢哋個「王子」魯爾點樣處置？
菠蘿文：皇馬大把錢，你唔使同佢愁，不過費格遜已經拒絕賣。
侍仔：呢個老鬼都算清醒番一次，賣雲佬等於自殺，唔通靠沙夏同朗尼？再唔係就蘇斯克查㗎啦。
雲達沙買得精明
招積域：曼聯近年已絕少具級數收購啦，對上一次已經係買雲達沙。
菠蘿文：我好記得費Sir當初嫌「細哨」太貴，最後畀巴塞買咗，𠵱家拎埋歐冠盃，諗起都想笑佢！雲達沙呢個龍門真係好堅，佢走咗都唔知搵邊個代替。
侍仔：曼聯再繼續入無質素嘅貨遲早沒落。
（本欄逢周一至周五刊出）
高洛文