意甲聯因假波事件而搞到立立亂，啲強隊好似西甲皇馬、英超車仔同曼聯咁就等住執筍貨。法甲朗斯雖則冇錢掃貨，但亦出嚟搵着數，話歐洲足協應該將意甲聯其中1個歐冠盃席位畀佢哋。
假波案令祖雲達斯、費倫天拿同拉素降班，AC米蘭亦被褫奪歐冠盃資格。如果歐冠盃席位係順次序落，咁就會由第7、8位嘅基爾禾同埋巴勒莫補上，並同國際米蘭及第5名嘅羅馬一同參賽。但朗斯就反對咁做，話佢哋今屆喺法甲聯攞殿軍都踢唔到歐冠盃，冇理由排名喺佢哋之後嘅意甲球隊有份參賽，所以要求歐洲足協減意甲聯1個席位，再喺法甲聯加番1個，等佢哋可以玩埋一份。
要求削減意甲席位
朗斯會長馬廸爾咁話：「喺我哋嘅聯賽，第5名都係打歐協盃，但意甲聯嘅7、8名卻有機會打歐冠盃，有冇搞錯呀！」
我求大俠雖然覺得朗斯好有理據，但歐洲足協為免順得哥情失嫂意，點都唔會應承畀個歐冠盃位佢哋。查實得3個歐冠盃席位嘅國家唔止法國1個，德國同葡萄牙亦都係一樣，而荷蘭同蘇格蘭更少，只得2個位。若然要攞意甲聯啲位出嚟分，點分都唔會勻。更何況，既然歐洲足協一早定咗係咁，就唔應該因為嗰個國家嘅聯賽有咩嘢突發事件而改變，否則肯定天下大亂。
「所謂一沉百踩，??家意甲聯搞成咁，係人都出嚟抽水啦！唔好唔記得，意大利喺世盃決賽贏咗法國，佢哋後衞馬特拉斯仲出陰招搞到施丹出場，法國佬仲唔趁機報復咩！