32歲名模周汶錡隨着年紀漸長，如墮變臉魔法陣，五官日見精緻，愈來愈靚女。兩年前本報曾率先踢爆周汶錡薯妹變鳳凰，近日她的面貌再度突變，鼻樑忽然再變高及變挺，扁平下巴離奇拉長如一彎新月，兩邊腮骨則呈現凹凸之狀，右邊臉更隱藏一條淡疤，有加工修葺五官之嫌。
周汶錡年紀愈長樣貌則反自然地變得愈靚，一直是本地模特兒界的熱話，早於兩年前本報曾率先報道其容貌的蛻變過程，由多年前初出道時的Pizza大圓面變成纖細瓜子面，本來明顯突出的腮骨離奇收細，腫脹眼皮縮水，連闊扁鼻樑也變成高鼻，雖然她自稱因9年前箍牙後水腫及babyfat消失，令其外貌產生變化，更理直氣壯地說：「我媽咪生我出嚟就係咁嘅樣。」但近日她忽然再次變臉，五官比前又添幾分精緻。
下巴兜兜
平面一族改造新輪廓
上周六，刻意打扮得高貴迷人的周汶錡身穿白色低胸連身裙，到灣仔會展為其新書造勢，在場記者問到她何時會與法籍男友Julien拉埋天窗時，她歡天喜地表示自己隨時嫁得的同時，忍不住笑到四萬咁口，但她咧嘴一笑即時令突變五官迅速現形。
其實周汶錡本身屬扁面一族，輪廓毫不明顯，下巴扁而平，但當日周汶錡居然下巴兜兜，笑起來兜至接近鞋抽地步的下巴比鼻頭還要凸出，與「超兜巴」女藝員馬蹄露不遑多讓。
另一方面，周汶錡的鼻樑也同時變得高而直，幾可用間尺畫出線條。但其腮骨線條則出現了一些凹凸不平的異物，右邊臉近頸位置隱約見到一條可疑的淡疤，遠觀伊人的確漂亮，近觀則明顯可見加工痕迹。
整容人辦
米高積遜尖鼻子下塌
事實上，圈中名人明星為留住美貌，接受整容及隆胸已相當普遍，港星鄭裕玲和容祖兒等均曾先後招惹整容傳言，近日連台灣歌手江明學也大爆陶喆、王力宏曾削下巴、蔡依林與徐熙娣（小S）則接受過隆胸手術。
不過圈中人對整容雖然敢做不敢言，但不少明星整開有癮，每年都抽空將五官執完再執，久不久便會發現有藝人突然變靚或身材變勁。日前本地名媛尹婉媚便在電台節目中坦承曾經整容，又指整容會整上癮，難怪美國過氣天王米高積遜（MichaelJackson）這個整容人辦，多年來會不停將自己的膚色及五官又漂又整，結果搞到如今鼻子下塌及五官扭曲，更在近期的英國問卷調查中被選為「十大失敗整容名人明星」之首。
敢言名媛
「醫學美容打支針之嘛」
此外，名媛尹婉媚昨日接受記者電話訪問時，重申她做的是醫學美容，不屬整容，她說：「所以啲明星冇講大話㗎，佢哋係冇整容，整容要開刀，我哋呢啲醫學美容係打支針之嘛，我開始咗打Botox兩年半，有時係我做醫生個仔親手幫我打，打呢啲針一定要手勢好，唔係阿豬阿狗都可以幫人打，半年打一次，每次幾千蚊，做facial一次都要千五蚊啦。」
尹婉媚又承認每年會到瑞士注射一次羊胎素，她說：「人胎素我就唔敢啦，因為人體內有好多毒素同細菌，食得牛多又唔知有冇瘋牛症，醫生都唔建議，呢個programme公價係15萬，不過我要搭頭等連埋滑雪同shopping，就30萬左右啦，拉勻條數每個月平均使兩萬蚊，如果經濟上負擔得到嘅，Whynot？」
採訪：林妃、顏英儀
攝影：陳偉權
