港股連跌4日，跌勢已愈來愈慢，跌幅亦已收窄，噚日恒指曾下跌近百點，收市企穩在16000大關之上，僅跌20點，期指低水亦大為收窄。上升股隻再次多過下跌股（俱不計認股證），若外圍再無大衝擊，港股跌勢可望喘定。
連日跌市，中油潔能（260）卻逆流而上，繼前日升3仙後，噚日再進賬2仙，高收0.67元。5月中，中油潔能曾見0.75元，大市調整至今，唔少細價股跌幅都幾大，20%到30%的比比皆是，但中油潔能只下跌約10%，相對強勢。
中油潔能自轉型燃氣業務後，已變身成為基金股，不過，由5月8日到7月7日呢段時間內，中油潔能嘅揸家有好大變動，期內有近2億股以大成交上板轉手，基金大部份都執過位，靜咗一輪後，新揸家似已開始發動攻勢。
中油潔能大股東中國航空技術（232），持有20.27%權益，以前的第2大股東IntegratedAsset經多次減持後已淡出，現時J.P.Morgan持有1.56億股（佔12.31%）、BonusWorldLtd.1.24億股（9.82%），以及LeggMason4351萬股（3.43%）。
基金持貨多
除以上嘅機構投資者外，中油潔能上禮拜剛做完「披成」，總數1.65億股每股作價0.53元，全部由大股東同基金要晒。中航技術攞咗2500萬股、環華4000萬股（2.79%）、新揚4000萬股（連同之前擁有權益合共6.41%）、中揚4500萬股（3.14%）同富裕1500萬股（1.05%）。
中油潔能發行12.69億股，已知的機構投資者持股量約佔39%，連同大股東持股合計近60%，還有基金持股少於5%而毋須申報的，相信亦有不少，照計街外貨源並不多，大戶若要發動攻勢，股價升勢可以好勁。
有一點要留意嘅，係最近一次「披成」嘅認購者，除中航技術同有關連的環新外，其他3家基金應該係同路人，今次中外基金合力出擊，應會上演一場好戲。
中油潔能走勢近兩個月已形成複式頭肩底，現時已衝破0.65元的頸線阻力，照度上去，短期上升目標係0.83元，中線有機會重上05年初的1元高位水平。
郭兆誠