望吓幅大相，除咗一碟二碟大堆頭之外，你仲見到啲乜？睇唔到？再望清楚啲，望到未呀？無錯，係一個二個趣致可愛嘅BB仔。我認我戀童，吖，唔係，直頭係戀BB，每次見到BB都要摸兩摸，仲好想咕嚕一聲吞埋BB落肚，嘩……正！你話我變態？我認㗎，BB魚、豬、雞、鴨肉質全部鮮嫩過唐僧肉，咁好味，點忍口呀？
記者：黃若茵 攝影：陳偉強、譚盈傑
𢱑爆頭諗新菜式
點解無厘頭會彈出呢系列BB菜式？咁就要由曼谷乳豬講起，話說「心‧泰」喺時代廣場開新分店，九龍灣舊店一班師傅決定搞新菜式，師傅A話：「啲客俾銅鑼灣新店搶晒咪弊？」師傅B話：「啲客俾自己友搶走都唔掂喎，點都要搞吓新菜式。」好，呢啲咪叫良性競爭囉！競爭還競爭，不過到落實執行嗰陣，煩嘞。睇餐牌，香濃肉類、清淡菜類、惹味炒飯乜都有，加新菜式但同時唔可以違背正宗泰菜風味，好難搞。正當大家頭痛之際，師傅C忽然大叫：「乳豬！」我見識少，乜燒乳豬係泰國菜咩？師傅D解釋：「唔少港人去曼谷唐人街都一定食燒乳豬，所以呢味菜嘅英文名叫ChinaTownBB。」之但係乳豬又實在太普通，所以師傅ABCD就諗到用Size超細肉質特嫩嘅BB豬入饌。有謂一不離二，二不離三，既有豬，又點少得雞、魚、鴨呢？就係咁，一系列獨家推介嘅BB菜就出世喇。
用重量做準則
BB菜？幾有趣吖，不過三秒後我隨即有疑問：「乳豬本身都已經係豬仔啦，仲可以點樣BB法呢？」睇大細好難講嘅，師傅A就用重量做準則：「一般燒乳豬大約重8斤，我就用只有4斤重嘅BB豬仔，又好似雞咁，一般4斤左右，我就用只有1斤重嘅雞。」食材體型相差咁遠，烹調方法同時間都好唔同：「要特別留意住時間，煮BB菜用嘅時間比其他同類型嘅菜少，唔小心煮得太耐，肉質就會失去嫩滑口感，盞嘥料。」
記者直擊
平日幫阿媽拎拜神乳豬，又重又大份拎到手到軟埋，邊有呢隻BB豬咁的骰呀！
豬
乳豬‧泰式沙律（全隻$168，半隻$90，例牌4件$50）
豬BB：「嗱，唔係我賣花讚花香，豬皮的確脆薄無得彈。師傅先片起面皮，𠝹走皮下脂肪再喺豬肉搽上醬汁，然後將豬皮放回原位，工夫繁瑣好考心思㗎。醬汁呢，鹹中帶甜，加入葱碎、蒜頭調味，嗒落隱隱約約有啲辛辣，好正㗎。」
魚
火鍋‧泰式BB魚湯底$188
魚BB：「泰國人叫火鍋做『情尋』（讀音），『情』指醬汁，『尋』指湯鍋。用4至5両重BB梭魚加香茅、羅勒等香料熬出鮮甜湯底，配酸子汁、魚露等8種口味醬汁。配料呢？8種即日鮮，今次有鮑魚仔、鮮貝、魷魚同西冷牛，包你飽肚。」
鴨
香茅BB鴨$78
鴨BB：「1斤重多啲，望落去係有啲似滷水鴨，不過叫得做泰式煮法就當然無咁簡單。煮鴨嗰陣會加入香茅油，令鴨肉味道更清新，香而不濃。肉質既嫩且爽，咬落唔覺油膩，好好味㗎。」
雞
泰皇妃BB雞$78
雞BB：「咪誤會，1斤重『泰皇妃雞』，唔係皇妃專用食法，亦唔係乜嘢特別品種嘅雞，講穿普通燒雞一隻，只不過係泰國人慣叫燒雞做『皇妃雞』咁解啫。呢道BB燒鮮嫩雞皮脆不在話下，秘製醬汁仲酸酸辣辣，將油膩嘅燒雞變得清雅，好正㗎。」
東北泰烤飯糰$12
泰國東北部家常地道小食，用糯米同白米搓成飯糰，搽魚露同蛋漿再烤，面層香脆內裏軟綿綿，點指天椒魚露更香口。
心‧泰‧軟之冬陰芝士餅‧香茅雪糕$36
冬陰功味暖心芝士餅配香茅味冰涼雪糕，口感一冷一熱，嗒落又幾過癮喎。
無吹水，個個撐BB豬！
張小姐
隻乳豬燒得好靚喎，塊皮好脆，咬落仲卜卜聲。
陳太
鴨肉夠腍，食得出好嫩，乳豬都做得好唔錯。
阿聰
雞、鴨、豬三種肉都好嫩，雞比平日酒樓吃到嘅好味十倍，乳豬皮都好脆口吓。
Jeff
乳豬最得！𠵱家好難食到咁少脂肪嘅乳豬喇！
馮小姐
嚿乳豬都幾多肉喎，個醬比平時食開嘅惹味啲、香啲。
魚露是「屍汁」？
泰國菜好講究香料及醬汁，魚露更是必用調味料之一。平日大家吃泰國菜，，少不免都會蘸點魚露，貪其獨特的酸甜味道令人更開胃。不過不說不知，原來魚露的製造過程都幾核突，有說魚露是活魚生生曬死過程中滴下的液體，換個講法，即是「屍汁」？因此會帶有一股濃濃的臭魚爛味道。不過亦有人說是魚露是一些小魚小蝦發酵滴汁而成，信不信由你，不過我偏向相信後者。
搵食攻略
心‧泰（27967818）
地址：九龍灣德福廣場F1號舖
營業時間：11:00am-11:00pm
交通：地鐵站A出口，惠顧滿$300可獲德福廣場1小時免費泊車
座位：連卡位150個人均消費：$120
有着數：晚市惠顧滿$400，即送餐廳招牌菜1份
最好賣：乳豬