噚日，財政司司長唐英年卒之攞政府銷售稅建議出嚟畀大家睇。冇辦法，就算係極權政府，要霸王硬上弓、迫婚，始終都會到「醜婦終須見家翁」嘅一刻。唐司長話：「明白有關議題（萬萬稅）具爭議性，希望迫市民心平氣和討論。」首先，孫柏文好同意唐司長嘅「溫馨提示」，所以我好「心平氣和」咁睇「萬萬稅」嘅細節。
睇完細節之後，我隻金手指亦好「心平氣和」咁充滿血，跟住就向播緊唐司長嘅電視畫面，行咗個「一指禮」。我諗大家都會同意，噚日政府發布嘅「萬萬稅」建議千瘡百孔，有左抄右抄之嫌，如果要用五個字去總結，就係「未經過大腦」。負責寫噚日「萬萬稅」建議嘅官員們，好似求求其其交啲唔會影響「升途」嘅功課咁。
雖然我隻金手指已經向唐司長行咗個「一指禮」，不過睇電視見到，鬧得最精采嘅就一定係田北俊、方剛、張宇人呢個自由黨鐵三角。睇佢哋鬧政府，就好似睇緊啱啱踢完嘅世界盃咁。根據《利字當頭》一欄總舵主利世民兄嘅分析，自由黨踢嘅係70年代荷蘭「全能足球」，因為「全能足球」嘅神髓就係所有球員都係冇既定位置，而呢個亦都係自由黨一貫作風。政府嘅一貫踢法就係義大利式嘅catenaccio（窒息型防守），因為政府由解放以嚟一路都係唔畀人入波作為主導方向。
世民兄話：「今次唐英年司長攞啲『未經過大腦』嘅『萬萬稅』建議出嚟，就好似『政府隊』嘅後衞，被『自由黨隊』收賣咗咁。係咁喺『政府隊』嘅禁區裏面，鏟低『自由黨隊』嘅球員，等『自由黨隊』有大把機會踢十二碼。」如果我哋特區人民，唔係知道唐司長對曾蔭權特首永遠效忠、絕對忠誠，都有機會相信利世民兄嘅分析。
中一編班試
講起求求其其交功課，我哋特區政府今次真係又鼓勵學生哥咁做。噚日政府舉行中一編班試，呢個試就係各大中學考啲9月嚟緊嘅中一學生，目的完全只係想幫啲中一學生以前間小學分級別。對學生前途完全冇影響。
如果你係學生，叫你去考試，不過你知道呢個試考成點，你嘅前途都冇分別，你會點考？如果你係一個校長，噚日要面對一班要考呢個試嘅學生，講啲要佢哋出盡全力之類嘅說話，你又會講啲乜？噚日我就問我老友何洱緣會講啲乜，以下就係如果佢係校長，佢會講嘅嘢。
「嗱，各位同學，雖然收咗你做學生，但我哋第一次見面，點都要畀個好印象我哋，所以一陣個考試，同你有關無關都好，都唔好趴晒喺度啊！我諗你哋喺小學畢業嘅時候，實畀咗一百幾十蚊小學校友會入會㗎，咁你哋一陣間就要更加畀心機考啦！唔係一個唔覺意影響咗師弟妹升唔到好學校，校譽受損，實搞到小一收唔到生，咁俾教（飯）桶局殺校，校友會都解散埋，你哋嗰一百幾十入會費就凍過水㗎啦！
「唔……如果你連校友會都冇入到，我就會同你講，一陣間個考試一樣要考好啲，原因好簡單，如果你老竇唔及早將你放洋留學，喺未來呢七年，你將會有無數個同樣唔知點解要考嘅試要考，我唔講一試定生死嘅公開試，教桶局發明嘅乜乜內評、自評、外評，都將會考到你萬試不死，呢個就當係訓練。弊！唔記得教桶局要我進修嘅學位今日要考試㖭！講住咁多先！」
孫柏文