醫生唔准宣傳，醫生被傳媒訪問都可能被醫學委員會抽秤。醫生分為兩派，老派反對宣傳，新派認為可以放鬆，向律師看齊。老派多係年老醫生，你知啦，以前醫生短缺，老派醫生幾乎人人上咗岸，有晒口碑，保護現有利益要緊，講宣傳，咪益咗啲後生醫生發圍，從後趕上？所有唔准宣傳嘅專業，幾時都包含咗保護主義嘅影子。
律師准宣傳之後，多姿多采，益埋報紙。搞IVA（私人債務重整）、破產、離婚、索償呢類標準法律程序，又平又正。用營銷學術語講，法律產品標準化，服務提供者互相競爭，有利消費者。
校長W近幾個月為學校校董會成立註冊法團煩惱，因為佢唔多熟法律，覺得萬事起頭難，但係教統局提供三十五萬元法團註冊津貼，一簽字承諾搞註冊，就好快收到十七萬先，校長W好想有呢筆錢嚟推動教學改革。煩惱之際，竟然收到兩間律師樓嘅信，一封邀請學校派人參加學校法團註冊講座，由××律師主講；另一封直截了當，話明推出教育法團註冊「產品」，標準收費若干萬元，封信由「業務發展總監」（BusinessDevelopmentDirector）簽署，睇呢個銜頭，律師樓就嚟有董事總經理、產品發展總監……㗎嘞。
校長W唔識甚麼律師樓，將封信畀左丁山睇一睇，咦，第一封信嘅律師樓，係中環有名氣之「名店」噃，乜名店都放下身段，發信邀請學校參加講座呀？第二封信係由一間中小律師樓發出嘅，內附律師CV兼英俊彩色照片，言辭極為進取，校長W睇到心郁郁。
不過，學校受政府津貼，使錢受廉記監管，一個唔小心，俾小人篤背脊，監都有得坐。於是左丁山叫校長W是但搵多兩間律師樓（睇《蘋果》廣告就搵到），加上主動發信呢兩間，一共四間律師樓，請佢哋就法團註冊呢件產品競投。校長W話：「問題係，價低者得，就唔會畀廉記過問，但我唔知邊間律師樓嘅服務最好噃，你話靚嘢冇平啫，廉記唔理㗎！」做校長，點可以孭鑊，一於推晒畀校董會。