侍仔：噚晚睇戲睇到精采處，講咗句說話問候媽媽，身邊嘅南韓女友即刻起身走人，我都幾樣衰吓。
招積域：以後講粗口都可能俾人告性騷擾呀，有個婦女團體打算透過立法會將「問候媽媽」說話，納入性騷擾範圍。如果真係成事，球員咪好慘？
菠蘿文：我覺得咁做係多餘，問候媽媽有罪，但都有粗口問候爸爸，但咁又無罪，係咪叫男女唔平等呢？
擬納入性騷擾範圍
Raine：你個侍仔係咪話我鬧你唔畀講粗口呀？我支持婦女團體咁做呀，等你哋所謂球迷第日收吓口！
招積域：有球員唔講粗口？你落旺角場睇吓啦。加上粗口係嶺南文化之一，歷史仲比中原文化耐，我哋要維護呢種獨特嘅語言！
菠蘿文：粗口同足球一樣係世界共同語言，香港有言論自由，立法即係違反基本法。
Raine：侍仔！你做咩唔出聲呀！你再唔講嘢我返南韓㗎啦！
侍仔：我都唔贊成講粗口，說話咁肉酸……
Raine：你咁講就錫晒你啦！以後睇波同睇戲都唔畀講呀！但我就可以講，因為佢哋無話唔畀問候爸爸。
招積域：女人真係雙重標準，侍仔你都幾慘，睇波又無咗一種樂趣，哈！
菠蘿文：講真，睇波爆粗真係一種樂趣，特別係大家喺某個時刻同聲一叫，全世界距離即時拉近。
招積域：無錯呀，𠵱家都有唔少人研究粗口呢種語言，即係呢樣嘢其實幾有價值啦，係咪？
Raine：講嘢要顧吓人感受，只顧自己爽就爆粗，咪即係我全家都俾你強姦？強姦係刑事罪，爆粗都係有意圖去犯罪，做咩唔立法呀？
侍仔：係嘅係嘅，爆粗嘅人真係唔要得！
招積域：得啦，既然你咁樣，我以後有咩波衫抵買都唔預你，有異性無人性！
菠蘿文：唔好咁小器啦招積域，爆唔爆粗以後就心照不宣啦！最多自己喺屋企講，喺屋企睇波算數，出街睇又驚俾人捉你性騷擾，都唔知係咪有啲人食飽飯無嘢做，得閒光顧我間茶餐廳，好過搞咩「唔畀講粗口啦」！
文：高洛文