經濟發展及勞工局前副秘書長馮永業喺今個月初，傾成新嘅中港航權安排後，功成身退，過咗去民政事務局，佢個位由保安局嘅黃偉綸（Michael）接手。米高噚日首次代表經濟局，出席立法會經濟事務委員會特別會議，討論國泰收購港龍航空單刁。
華華覺得米高非常熟口面，諗諗吓先醒起，佢舊年喺南亞海嘯期間，代表保安局日日見傳媒。雖然佢嚟自保安局，但其實之前曾經喺經濟局做過5年，仲負責航權（國與國之間嘅航班配額）談判，非常熟悉航空事務。唔知係咪咁，經濟局常任秘書長鄭汝樺噚日都好放心，不時將議員嘅提問交畀米高答。
講番國泰收購港龍單刁，班尊貴議員問嚟問去，都係關心兩間公司合併後會否壟斷市場。其實呢單刁根本就唔關政府事，決定權喺大小股東手上。況且，𠵱家乜嘢時勢？航空公司都要面對區域同全球航空公司嘅競爭，邊有航空公司可以隨便壟斷市場，或者夠膽加價呢（加燃油附加費例外），𠵱家仲講規管航空公司票價？過時啦！
鄭汝樺講得好
都係鄭汝樺講得好，佢認為，特區政府應該積極同其他國家傾成更多開放航權嘅協議，等消費者有更多選擇，比規管及控制票價，更有效提高市場競爭力。
而且，呢個時候話國泰收購港龍，再與中國國際航空互控，令三間公司有機會集體議定票價，減低市場競爭云云，似乎言之尚早。
李華華
讀者如有任何意見或報料，歡迎發送電郵至[email protected]。