卡片DC大行其道，忽然間多咗好多女仔手執相機，享受拍SnapShot樂趣，不過並非個個影得一手正相，尤其撞正室內拍攝真係即時考起！呢個禮拜尾富士就有部Z3到港，全身充滿迷人Pink之餘，仲具有1按2拍功能，一下快門幫你影低有閃燈同無閃燈效果，揀啱心水先Save，毋須Set掣再影過，堪稱粉紅救兵！
記者︰陸俊雄
攝影︰周旭文
ImageGirl︰Macy
富士最新呢部FINEPIXZ3唔止有齊銀色、粉紅、紫紅及海藍4色機身，仲比日本7月29日發售日足足早10日有得賣！要數最得女士喜愛嘅，肯定係PinkLady，事關女嘅鍾意顏色青春之餘，卡片Size夠輕巧；男嘅又會買佢嚟贈佳人，討女士歡心。
咪睇Z3除咗機身顏色同上一代Z2有別外，以為功能上完全冇分別。其實佢新加唔少貼心功能，如新增內置10MB記憶體，就算影爆卡都畀機會你影多7張Normal質素嘅相；又例如「防震模式」咁，自動調高感光度同快門速度，幫用家拍攝移動中嘅物體時，更加得心應手。最重要係按1個掣就搞掂，方便女士們簡簡單單都影到靚相。
1按2拍當補鑊
新增功能中，當然唔只「防震」，要數最特別嘅一定係1按2拍嘅「dual-shot」功能。即係所謂嘅連拍嗎？非也，因為1按2拍所影出嚟嗰兩張相，一張係冇閃燈狀態下，用自然光影出嚟，而另一張則有閃燈，一影兩種效果。咁樣並非多此一舉，反而係方便用家喺唔知用唔用閃燈時，輕鬆幫手做到決定，毋須下下重影咁麻煩。
其實有好多情況需要用到呢種功能，遠嘅唔講，例如去澳門遊訪葡式建築嗰陣，或到大學影畢業相時，經常遇到室內環境光線不足；又如夏天去沙灘玩，遇上背景係水面同沙地，光度反差太大等。1按2拍後，同一畫面下即時做比較，用家自會掌握到究竟係咪需要用閃燈。
場景模式增至15種
雖然Z3呢類卡片型相機冇支援光圈先決、快門先決及手動曝光，不過對比上一代Z2只有5種場景預設拍攝模式，Z3有成15種咁多，可以話呢方面嘅功能比以往多出3倍。當中包括自然光、自然光與閃燈、人像、風景、動感、夜景、煙花、日落、雪景、沙灘、博物館、派對、花卉近距、大特寫以及文字模式。靚女Macy影就俾人影得多，自己揸相機拍攝時，都係愈多預設場景愈好，好似Z3基本上日與夜、室外室內場景有齊晒，攝影新手都讚好。
叉電過相靠機座
睇番Z3機身四邊，其實按掣、外接插口都唔多個，最多係機頂拍攝掣，機底有個插口可連接隨相機附送嘅機座，就係咁簡單。咁樣有辣有唔辣，好嘅係用機時，所有掣集中喺機背右面，而任何過相、AV輸出、叉電等程序，都係放上機座上面去搞。唔好嘅係，要喺電腦上面先裝軟件，冇咗機座連繫就做唔到。加上富士一向用xD卡，想用讀卡器，又要用個插到xD卡的。如果你係一向用開富士，習慣咗當然問題不大，但筆者係富士機新手，就要畀時間適應一下。
PinkLady實試
試人像
富士DC出名影人像一流，就算喺室內，優良ISO亦可減低暗渣出現。
第1拍
前光後暗
1按2拍後，第1張啓動閃燈，人像太光而背景太黑，一貫「謝師宴」新手毛病。
第2拍
前暗後光
第2張就關閉閃燈，令相片吸到現場光而表現較自然，若然稍懂執相，將兩者組合則可得出更佳效果。
PROFILE
感光元件：510萬像素CCD
變焦︰3倍光學、5.7倍數碼
屏幕︰2.5"TFT（230,000萬像素）
鏡頭︰相當於135格式36-108mm
光圈︰F3.5/F5/F8
快門︰4秒至1/1,000秒
感光度︰ISO64-1600
儲存卡︰xD
內置記憶︰10MB
尺寸︰90×55×20mm
重量︰130g
查詢︰富士攝影器材（24063223）
同場加映
3"大芒具5倍變焦
除咗今日介紹嘅PinkLady外，富士仲有部至新嘅F650新登場，600萬像素加上3"大芒，搭埋首次提供嘅5倍光學變焦，連同4.4倍數碼變焦，足足有22倍變焦功能畀你任Zoom唔嬲，定位明顯非入門級類別，對於影厭全自動儍瓜DC，F650將會係操練技巧好機會。機身細細再加薄邊3"芒，達到機細芒大嘅新趨勢，揸過上手先感覺到其輕便；F650有效像素達600萬，又有個23萬像素嘅3"屏幕。咪以為乜都多咗，部機一定大牛龜，機身厚度只不過1.2"，重170g，打低好多同級對手。
F650Profile︰
感光元件：600萬像素CCD
光學變焦︰5倍
屏幕︰3"LCD
儲存卡︰xD
內置記憶︰26MB
機身尺寸︰104.7×60.6×30.8mm
機身淨重︰170g