立法會工商事務委員會噚日討論CEPA嘅進展情況，內地自由行雖然令本港零售業起死回生，但服務貿易中嘅專業服務界別就唔多覺受惠，工程界別嘅何鍾泰議員就喺會上發嘮蘇。
佢話專業服務界別對CEPA好失望，實施2年半以嚟，除咗法律界別因前律政司司長梁愛詩努力跟內地聯繫，𠵱家律師行可以跟內地同業聯營外，其他專業界別，仍只係停留喺資格互認階段，仲未攞到內地嘅執業資格；而且門檻又高，根本冇乜人獲益。工商及科技局副秘書長容偉雄話，呢個會係佢哋今後嘅重點工作。
容偉雄重申CEPA喺04、05年已為本港創造咗2.9萬個職位，不過勞工界別嘅王國興同陳婉嫻議員，係要重覆佢哋喺立法會問過幾百遍嘅問題：「政府點樣增加更多就業職位？」一條問題可以走遍立法會，做立法會議員唔係咁難啫！