中國人過生日會食紅雞蛋、西方人就會食生日蛋糕！居港10年嘅印度人阿星，就話要俾老婆過一個最傳統印式生日；就係食甜黃飯！圓圓嘅飯面插着生日蠟燭，壽星女SINGH已開心得眉開眼笑，甚少下廚的老公仲煮下最傳統印度菜，同佢撐枱腳賀生日，SINGH話呢個係嚟咗香港過得最開心嘅生日。
記者：葉雪芯
攝影：譚盈傑
示範：上環讀者阿星
印度甜黃飯 甜甜哋襯咖喱至正
價錢：$15/2人份
需時：20分鐘
印度甜黃飯是個個印度人過生日必食的，簡直同生日蛋糕一樣！阿星話：「印度人相信食咗甜黃飯，會為嚟緊成年都帶嚟好運」，呢啲「老嚟」嘢，邊個敢話唔食，記者聽完都馬上叨光喫番碗！食落口感非常好，幾有咬口、又有飯香，最緊要係黃澄澄好鬼靚，而且佢仲輕微帶甜的感覺，阿星話用嚟襯咖喱類食品，絕對係夾到絕！
材料：印度米2碗、水4碗、印度食用色素1/4茶匙、牛油少許、糖適量
印度米$28/2千克（c）
印度食用色素$18/250克（c）
牛油$12.5/250克（b）
簡易法
1.洗淨米，放進電飯煲，加入水煲熟飯；
2.飯熟後加入牛油、印度食用色素、糖，拌勻即可。
貼士：阿星教落，可以在飯中加入杏仁粒，會增加口感同香口啲。
家鄉印度咖喱豆 有咬口撈飯最惹味
價錢：$20/2人份
需時：20分鐘
印度人好鍾意食豆，佢哋家鄉就有好多不同嘅豆出產，好似印度黑豆、馬豆、紅豆等，但呢啲品種喺香港當然比較難買到，阿星話試過好多種香港本土買到嘅豆，發現以馬豆同黑豆嚟做咖喱最有口感同香口，勁有印度風味，用嚟撈飯隨時連添幾大碗！另外佢仲話，正宗印度咖喱最特別的精髓係「咖喱粉」！一般印度人都會自己磨製，成份多數是大茴、小茴、黑胡椒等，所以每家每戶的咖喱都有少少唔同味道㗎！
材料：黑豆4両、馬豆4両、番茄1個、薯仔1個、洋葱半個、咖喱粉4茶匙、黃薑粉4茶匙、薑2-3片、油少許、水1碗
黑豆$4/300克（a）
馬豆$4/300克（a）
番茄$5/3個（a）
簡易法
1.先將兩種豆洗淨再浸水5分鐘；
2.燒熱油，將番茄、薯仔、洋葱切粒炒熟，再加入咖喱粉、黃薑粉、薑片同水煮10分鐘；
3.放入浸好的豆，待豆煮腍後即可上碟。
貼士：想買到製造咖喱粉嘅材料，可到灣仔寶靈頓道「印度商店」，好多印度鄉里都去嗰度入貨㗎！（查詢：28918024）
正宗印度酸奶（配薄罉）食咗酸奶皮膚勁滑
價錢：$30/2人份
需時：20分鐘
印度人除了鍾意食咖喱，仲好鍾意用奶做食材。阿星話，印度女仔皮膚都好滑，可能同食得多奶有關！老婆仔都好鍾意呢款酸奶，因為酸酸哋好開胃，奶香味又夠，配埋香脆的印度薄罉一齊食就最滋味！印度薄罉是印度人家常的食物，用來蘸咖喱又得，蘸酸奶又得，好味而且夠飽肚。
材料：牛奶500ml、乳酪1盒、馬豆適量、麥粉2碗、水1碗、油少許
牛奶$6.3/236毫升（b）
乳酪$7.5/150克（b）
麥粉$5.5/454克（a）
簡易法
酸奶
1.將馬豆洗淨備用；
2.將牛奶倒進碗中；
3.加入乳酪拌勻，再加入馬豆煮10分鐘，直至豆煮腍；
4.放進雪櫃降溫，雪凍後即可食用。
薄撐
1.用麥粉和水搓成薄餅狀；
2.燒熱油，將薄餅煎至金黃香脆即可。
貼士：不用馬豆，可選用其他自己喜愛口味的豆類代替。
咖喱炒雜菜 椰菜花勁腍 入口即化
價錢：$18/2人份
需時：15分鐘
材料：椰菜花1棵、番茄1個、薯仔1個、洋葱半個、咖喱粉4茶匙、黃薑粉4茶匙、薑2-3片、油少許、水1碗
椰菜花$7/斤（a）
薯仔$4.5/2個（a）
薑$5/150克（b）
簡易法
1.洗淨椰菜花，切好備用；
2.番茄、薯仔、洋葱切粒；
3.燒熱油，將以上材料炒熟，再加入咖喱粉、黃薑粉、薑片和水煮10分鐘；
4.加入椰菜花，煮腍後上碟。
貼士：如果喜歡吃辣一點，可加少許紅辣椒粉。
咖喱辣魚塊 香辣刺激 夠醒神
價錢：$20/2人份
需時：20分鐘
材料：魚柳半磅、紅辣椒粉1/2茶匙、番茄1個、薯仔1個、洋葱半個、咖喱粉4茶匙、黃薑粉4茶匙、薑2-3片、油少許、水1碗
魚柳$5.9/454克（b）
紅辣椒粉$7/100克（c）
洋葱$6.4/斤（a）
簡易法
1.洗淨魚柳切件備用；
2.將番茄、薯仔、洋葱切粒；
3.燒熱油，炒熟番茄、薯仔、洋葱粒，再加入紅辣椒粉、咖喱粉、黃薑粉、薑片和水煮10分鐘；
4.最後放入魚塊，煮熟後即可食用。
貼士：可用胡椒粉來醃魚柳，去除雪藏味。
（a）尖沙嘴金巴利道街市
（b）尖沙嘴金巴利道惠康超級市場
（c）尖沙嘴重慶大廈第3街26號新德里
＊以上價錢以7月18日為準