又話人工貴，又話原材料貴會打擊工業股，但一樣有人報佳績，其中股壇長毛同埋唔少芬佬鍾愛的愛高集團（328），昨日所公布全年業績好靚仔，盈利上升18％至2.83億元，而派息亦保持慷慨作風，除末期股息16仙外，仲有特別股息6仙。
愛高近幾年業績保持穩定增長，難怪芬佬對愛高不離不棄。隻股昨日最高見3.80元，收3.675元，升幅唔夠1％，雖然股價接近52周高位，但計落都係PE7倍，並唔係過份。
愛高業績好，主要係因為公司轉為生產高檔影音產品，毛利率較高，可以抵銷到成本上漲。
另外，上海棟華（8251）喺上周停牌，消息話公司將發行兩成新股，引入里昂證券旗下的基金做策略夥伴，據講配售價較停牌前2.225元有好大折讓，但泊到好碼頭，賣平啲又有乜所謂。
慕容小初