余文樂作為娛圈潮人，平日對衣、食、住、行各方面都幾有研究，上個禮拜五晚，樂仔坐保母車路經跑馬地嘅英國著名跑車AstonMartin陳列室，雖然明知已經閂咗門，但樂仔仍然唔放過機會，隔住櫥窗狂昅一部價值超過280萬嘅黑色DB9型號超級跑車。
睇足15分鐘
樂仔曾經喺電影《頭文字D》中飾演飆車手中里毅，私底下嘅佢真係好鍾意車，當晚佢企喺車行門口睇心水戰車，不停指手畫腳同司機吱吱噚，又打電話搵朋友講車經，仲煲住煙企出馬路，離遠睇部車嘅線條，睇足15分鐘至捨得走，之不過樂仔臨走時，就隨手將煙頭掉落地，公德心欠奉。
其實AstonMartin喺英國係唔少名人明星嘅dreamcar，球星碧咸、朗尼同傑斯都曾經先後買入呢個牌子嘅戰驅，就連飾演新版占士邦嘅丹尼爾基格（DanielCraig），喺11月上畫嘅007系列《CasinoRoyale》中，都係揸AstonMartin嘅DBS型號做媾女戰車。
睇嚟樂仔嘅品味都拍得住一眾英國球星，至於消費能力係咪一樣就唔知，之不過部車咁貴，齋睇都可以望梅止渴嘅！
