立法會就嚟唞暑，公民黨立法會四大狀之中，余若薇、梁家傑同湯家驊都會出埠唞唞，只淨番吳靄儀留港繼續為立法會審議竊聽條例做把關工作，即係有事就第一時間通知大家啦，而三大狀就盡量會趕及喺下月2號番嚟投票。
八方噚日去過公民黨位於告士打道永亨金融中心嘅新總部，有成2,200呎咁大，總幹事曾國豐話佢哋上星期啱啱搬入嚟，𠵱家好多嘢都未齊。
不過，最搶眼嘅就係掛喺門口寫住「樂山登萬仞愛水泛千舟」嘅對聯同一幅水墨畫，阿豐話呢幅對聯係出自一位年輕黨員季霆剛手筆，佢來頭唔小，係著名水彩畫家羅拔嘅外孫，又先後拜嶺南畫家司徒乃鐘同人物畫家羅冠樵為師。