亞太區股中，日韓休息，港股最硬淨。恒指散過186點之後，埋單只係唔見70點，萬六大關失而復得，收16064；期指跌多啲，跌125點，低水53點，仍在萬六關之上。
壞消息已經睇晒，市場有咗心理準備，唔使太悲觀，每次忽然跌落去，都可以諗吓細細注博C輪。
滙控C輪4485：滙控（005）收134.90元，跌0.70元，已經係連續第5日箭嘴向下，總共冇咗4.40元，估計就快會有反彈。吼C輪，諗隻4485。隻輪9月上旬到期，輪價39.5仙，溢價2.2%，槓桿率34.2倍（有效18.4倍），引伸波幅17.5%。遠期貨色，揀9399，輪價79仙，溢價3.7%，槓桿率17.1倍（有效10.2倍），引伸波幅17.6%。
新地C輪9209：新地（016）收76.90元，唔見0.30元，等下試上月低位76.10元，低撈C輪9209。隻輪12月聖誕前夠鐘，輪價53仙，溢價5.7%，槓桿率14.5倍（有效8倍），引伸波幅25.8%。
電盈C輪：番薯梁嗰頭（上周六）喺電台話基金有興趣買電盈（008），呢頭電盈收4.95元，跌0.10元，見換大股東新聞之後最低收市價。3隻C輪跌幅由4%至26%。上禮拜五見報發明個新字jarless，即係冇渣。4464與4847兩隻輪（9月同12月到期），好大機會jarless。9156（12月到期，行使價5元，到時正股應該已經除息3毫幾），有1半機會jarless。
章盛