間間銀行都有尊貴理財部門，招呼身家有番咁上下嘅大客，服務大家差唔多，要留住個客，一般嘅優惠同埋貼身服務之外，好多時仲要講心講感情，好似交通銀行咁，就專登請班大客去海洋公園玩足一日，包埋專車接送同自助餐，成功𠱁到班客笑騎騎。
交銀話，個活動係為咗慶祝通達理財（資產值需達80萬以上）推出一周年，所以喺6月中至7月中，前後搞咗7次海洋公園「結伴同悠」之旅，免費招待咗600幾個客人，而每次都有一個高層做伴遊兼主持大局，最近一次就係香港分行副總陳霞芳帶隊。
為咗𠱁班貴客，交銀特登安排佢哋同500幾磅嘅海獅近距離接觸，又請埋「威威司令」同魔術師搞氣氛玩遊戲，結果全日最開心嘅，唔係班大人，係班客嘅小朋友！