侍仔：隔籬街間超級市場執笠喎，佢啲貨𠵱家半價出售，真係半賣半送囉！大家有無執番多少先？
招積域：做得好哋哋因乜事摺埋？
菠蘿文：個老細因賭錢爭人數，最後連間舖都輸埋，咪要宣布破產囉。但佢間超級市場啲貨唔錯㗎，我啱啱先托咗幾包米返屋企。
吹水傑：我記得以前八佰伴執笠，自己都有陪阿媽入去掃貨，着拖鞋入去，然後着對佐敦波鞋出嚟，仲要唔使錢。
侍仔：嘩！你呢個無賴，竟然趁火打劫！同4大聯賽球會打祖記主意一樣，個個都想趁祖記內亂執平貨。
招積域：好正常啫，𠵱家嗰間超市10蚊有一罐頭鮑魚咁啫，唔到祖記唔放人㗎！出名嘅球員得廸比亞路同尼維特可能落去踢乙組。
菠蘿文：我覺得最乞人憎唔係執平貨嗰啲，而係一早跳船，𠵱家幫敵對勢力挖角嘅人。
侍仔：你係咪話卡比路？呢個正一人渣！自己跳船就好啦，𠵱家又搵埋班球員過檔皇馬，祖記多得佢唔少。
吹水傑：冷靜啲先，卡比路又唔係無嘢撈，做乜要同祖記降班？佢搵班球員過檔都係想佢哋好啫，但對皇馬班球員就可能係壞事。
皇馬結構問題遲早要
招積域：有乜咁壞，皇馬遲早都要執啦，咪趁𠵱家大修囉，無用嘅走，有戰鬥力嘅就留番喺度，咪畀班球星以為自己好穩陣。
菠蘿文：平日叫皇馬高層改革，睬你都有味！𠵱家因利乘便，可能皇馬有美好明天。
文：高洛文