前任政務司司長陳方安生呢排都好忙，風頭真係一時無兩，同市民7.1遊行完之後，近日又不斷曝光，催促政府同特首曾蔭權幾時落實普選路線圖同時間表。本身係亞洲青年管弦樂團成員嘅陳太，噚日出席樂團演奏會前嘅馬拉松式排練營開幕禮，被安排坐喺來自香港、台灣、中國，以及日本等地100個年輕演奏家中間試聽。
陳太聽曲嗰陣全程都瞌埋眼，嘴角就露出絲絲微笑，睇嚟陳太真係聽出耳油，後來陳太仲模仿身邊嘅小提琴手，作狀係咁用力拉，仲拉到似模似樣㖭。
講番個亞洲青年管弦樂團，𠵱家開始會一連三個星期、每周六日、每日九個鐘喺演藝學院進行地獄式訓練，希望稍後喺亞洲各國進行嘅22日巡迴表演有出色演出。