在外圍美股偏軟的影響下，港股昨日持續下跌，雖然下午跌幅收窄，成交只得186億銀。唔少股票就算有好消息都唔識得升，小初真係悶到頻頻打呵欠。好似建滔化工（148）昨日傳會分拆旗下業務上市，股價竟然倒跌4％，收22.55元，認真令人失望。
小初全日睇多過做，大部份時間同股友噴口水，主要話題係連跌多日的海域集團（1220）同海域化工（2882），昨日兩股停埋牌，莫非仲有大鑊嘢發生？
始終都係經紀黃最勤力，佢叫小初留意一啲跌得多，但質素唔差嘅股份，好似中糧國際（506）咁，隻股由年初高位5.10元回落，一度低見3.90元，家陣喺4.10元附近浮沉，噚日收4.125元，升0.6%。證券行睇中糧的目標價由4.50元至5.20元計，現價計仍有不俗水位。
中糧早前炒高，主要係市場憧憬業務可能重組。況且今年以來，玉米價格穩定，公司的酒類產品銷售應有唔錯增長，有利公司今年上半年的盈利增長。
慕容小初