九鐵前行政總裁楊啟彥舊年身體唔多好，醫生唔准佢外出，要留家休養，不過最近佢又可以出吓街同人食飯，噚日八方就喺沙田馬會見到佢同班舊同事食晏，精神都好唔錯。
詹伯樂請飲茶，楊官梗係畀面，話晒大家上司下屬一場，有詹兄回朝坐鎮，佢老哥都好放心。「詹伯樂跟咗我七年，係個工作狂，有嘢做就好開心。」
唔講唔知，楊官同陳太係同期考入政府做AO，時為1962年9月17日，同葉劉就做過同事，但係唔多熟，問佢點睇陳太同葉太嘅高見？楊官話香港有言論自由，但係佢都唔係幾明陳太講見步行步係乜嘢意思。
楊官以前好猛料，如果唔係肥彭搞亂檔，李鵬飛話過，陳祖澤同楊啟彥會分別坐上第一個華人布政司同財政司嘅高位，幾時輪到陳太同煲呔？