噚日八方同班記者行家去新加坡總統府，採訪煲呔見李光耀、李顯龍同吳作棟。新加坡嘅保安仲勁過美國，啲香港記者去美國國務院採訪國務卿賴斯，都淨係需要登記護照，做啲安全檢查就得，但新加坡唔單止要啲採訪記者先上繳本護照，男士仲要除埋皮帶先入得去，爭在唔使剝光豬搜身，真係夠惡！話晒新加坡又唔係得罪晒所有回教國家嘅以色列，做到要除皮帶真係好唔合理！
雖然話有得採訪，但係電視台都唔准帶魚杆同boom咪（即係收音能力較勁嘅咪，唔知係咪怕俾人扑親？），電台記者唔可以錄音，唔可以舉咪牌，淨係可以齋睇，認真掃興，搞到同班記者都唔係好知佢哋傾乜，淨係隱隱約約聽到李光耀話，佢精神咁好係因為日日游水。希望煲呔唔好學埋人哋啲衰嘢，限制記者採訪活動。