撈紅糙米煲飯健康啲，你知唔知？知？咁生命米比一般糙米更健康你又知唔知？唔知唔怪你，因為我都係啱啱知。事緣有日收到某店舖老闆娘來電推介生命米菜式，聽落好似純粹玩噱頭，米點樣有生命呀？佢話：「平日食開嘅白米或者糙米唔可以種到苗，生命米就可以好似種子咁發芽，生命力特強呀。」咁得意？梗要即仆去試吓……
記者：黃若茵
攝影：譚盈傑、周旭文
發芽係健康嘅標籤
13年前，「菓一道」老闆娘Anna仲係OL一名：「嗰陣時每日出街食Lunch都覺得好唔健康，自己又對味精敏感，搞到無啖好食，所以我決定開番間舖，等OL姊妹們有餐好嘅食。」近年流行食糙米，但Anna覺得糙米仲未係最好，所以前後搵咗10間米飯供應商，希望揀到隻最好嘅米：「呢啲生命米全部有機種植，粒粒未經打磨，有大量營養留喺殼入面先發到芽。我試過晒超級市場入面有得賣嘅米，無一種可以發到芽。」
食梗係要食最好
講講吓，拍檔Andy展示兩盒一紅一白米粒話：「呢啲糙米同出面嘅糙米唔同，出面買到嘅都係糙米，不過打磨過，只係打磨程度比白米少，所以發唔到芽。不過呢，亦唔係每批未經打磨嘅米都可以發到芽喎，有時啲米放耐咗，營養流失咗就發唔到芽㗎喇，所以我每次攞米返嚟，我都會抽樣試驗，發到芽先至用㗎。」我故意挑剔：「糙米夠健康啦，何必咁執着，一定要發到芽先用呢？」Andy好認真咁話：「既然花得時間食一餐飯，點解唔將最好嘅米食落肚呢？所以餐廳只會用最好嘅米粒，油就只用純度最高嘅橄欖油，糖我唔會用白砂糖，只會用黑原糖。至於生命米，成本都比一般米貴起碼一倍㗎。」
生命米發芽過程
生命米，即未經打磨嘅白糙米或紅糙米，無吹水，真係有生命！發芽過程好簡單，先用清水浸米粒，放喺陰涼位置，見米粒開始發芽就可以改放喺有陽光嘅地方，三幾日就愈標愈高喇。我攞咗幾粒米返屋企試試， 3至4日左右米粒已經茁壯成長喇！
A.蘭花芝味鱈花魚柳配有機糙米甘薯茸$78
伴菜有西蘭花，選用匈牙利鱈花魚，肉質爽滑脂肪少，咬落唔會成口油。生命米同薯茸撈埋一齊，腍身黐口嘅薯茸比例較多，間中咬到煙韌飯粒，口感有層次。
B.冰花玫瑰皮煎鮮鴨胸配野糙米飯$68
冰花玫瑰即用酸梅加黑原糖混成嘅醬汁，淋上生命米、野米同白米混成嘅飯糰，入口甘甜。鴨胸唔用煙熏咁熱氣，先用紅酒醃再板煎，肉質薄嫩不失肉香。
C.千島墨魚蝦子配有機糙米飯糰$68
飯糰同配料分開上，飯糰有紅糙米同白糙米、餡料有墨魚仔同蝦子，任你夾。自製千島沙律醬甜而不膩，夾住一塊青蘋果食，清新健康。
D.香葉虎蝦沙沙配有機糙米脆卷$68
用泰式春卷皮包住煮熟嘅糙米、青木瓜、日本蘿蔔同虎蝦肉，再焗一焗，令春卷飯粒外脆肉軟。醬汁用蒜茸、香葉、檸檬汁同辣椒調製，酸辣醒胃。
E.法式西洋菜米茸湯$25
生命米磨成米漿代替平常用嘅生粉芡，令湯有濃郁質感，入口咬到米粒感覺有啲似食粥，味道淡口勝在夠天然無味精。
F.零脂肪雪糕$38
完全無牛奶所以零脂肪，成個雪糕球只有生果成份。食呢款蘋果味雪糕，入口有少許果肉，不過比一般雪糕快溶，咪食到慢吞吞呀。
G.糙米粉特飲$28
特別揀芒果、橙同藍莓呢幾款對皮膚有美容功效嘅生果，打出嚟嘅果汁質感極似Smoothies，撒上糙米磨成嘅粉，口感有趣。
OL有Say：未聽過生命米照撐！
營養師都話好
身心營養顧問公司註冊營養師關淑瑩話：「未經打磨嘅糙米同白米，營養價值差好遠，以100克計算，未經打磨嘅糙米纖維含量1.8克，白米得0.4克；維他命B1、B2、B3含量就比白米多3至5倍；鐵質呢？未經打磨嘅糙米有0.42毫克，白米得0.2毫克。初初食未經打磨嘅糙米可能唔慣，最好先混合白米一齊食，由少至多增加份量。」
搵食攻略
菓一道（23771828）
地址：尖沙嘴廣東道122-126號中港中心1樓全層
營業時間：
周一至六7:45am-10:30pm
周日及公眾假期12:00nn-10:30pm
交通：尖沙嘴地鐵站A出口
座位：100個，窗口位置有落地玻璃，另有書櫃提供有關健康飲食的小冊子讓客人閱覽
人均消費：早餐及下午茶約$20-$30，午餐$50，晚餐$60-$80
有着數：店方派發免費傳單，傳單上有午市及晚市優惠券各1張
最好賣：雞扒飯，日賣300份