上半年樓市係點，大家都心裏有數，梗係一手市場最慘情啦，創96年有紀錄以嚟新低，但二手就逆市向好，除私人住宅成交增加外，連公屋都交投暢旺。
中原研究部高級經理黃良昇話，上半年共有108宗二手公屋買賣登記，較舊年同期嘅42宗，升近1.6倍；總值4939萬，升1.7倍。係2000年下半年有紀錄以嚟新高，仲係首度破100宗㖭。
睇番啲公屋買賣登記，馬鞍山恒安邨、青衣長安邨同黃大仙竹園北邨，都以9宗並列第一位，不過計銀碼就由恒安邨贏咗條馬鬚。
若以單一成交額計，最貴嘅係香港仔華貴邨華賢樓高層7室，成99.8萬，同屋苑嘅華孝樓低層3室，就以95萬排第二，果然係富貴公屋。竹園北邨桐園樓低層9室，則以94萬成季軍。