今日，財政司司長唐英年，就會第一次「正式」向我哋特區居民解釋，政府會點樣喺我哋市民之間做交易嘅時候「抽佣」。孫柏文落筆嘅一刻，當然唔知道唐司長會點樣令廣大市民「痛心疾首」，不過因為特區政府喺「萬萬稅」上，近排已經好似一個好耐冇維修嘅化糞池一樣，猛喺度「漏料」，所以我同大家一樣，都應該大概知道究竟唐司長會講啲乜。
我諗今日發布嘅「萬萬稅」版本同埋早前「漏料」嘅版本，最唔同嘅地方會係個稅率，「漏料」版話過會抽5%，發布版就應該會係3%。呢個係因為曾蔭權特首，啱啱從新加坡「學成歸來」，明白到連好似新加坡呢啲真正完全獨裁、白色恐怖、「強政勵治」嘅地方，都要將「銷售稅」定喺3%，先至可以搵市民笨。大家都知道政府最終要抽不少過5%嘅「萬萬稅」，不過先定喺3%，等到「銷售稅」摧毀咗我哋特區經濟之後，眼見稅收再次狂跌，又可以話財政有「結構性赤字」，到時候先至將稅率踢高到5%。大家可以從曾特首被冊封為爵士一刻「笑到見牙唔見眼」推斷，佢會學足前宗主國，將「銷售稅」稅率最終推至17.5%。
其實冇辦法，抽「萬萬稅」呢個概念，連白癡IMF（國際貨幣基金會）都有為我哋特區政府提供嘅建議。而特區政府照單全收嘅原因其實好簡單，我哋特區政府領導人，始終都係一個「飲香港水、流香港血」嘅人，IMF啲建議就當係modelanswer咁照抄，唔怪之得佢當年仲係學生嗰陣，可以喺填鴨式教育成功出位。
不過講咁多，政府都可能仲會「藝高人膽大」，「萬萬稅」稅率定5%開波。相信好多fan屎睇今日《
財爺講乜 特區都死
曾特首今次去新加坡，話到明去「學嘢」。我每一次聽到有特首去新加坡「學嘢」，我都已經好驚。董建華特首就學到「八萬五」，成功為我哋特區樓市降溫。曾特首當然都學過「強積金」，呢個每個月一次為我哋特區人民收到月結單嘅時候，帶來無比歡樂嘅政策。今次佢就去學「培訓政治人才」嘅方法，不過大家可能會問：「新加坡政府係唔係最好學習嘅對象呢？佢哋歷史以來，都好似只係出過一個政治家咁大把。新加坡如果真係有一個成功『培訓政治人才』嘅方法，李光耀佢老人家就已經可以退休，唔使好似𠵱家咁，日日都要返工。」問得好！不過呢個我就真係唔知，可能曾特首想學吓點樣先至可以，喺一個共和國國家裏面，成功舉行「世襲制」。原來曾特首新加坡之旅，可以用七個字總結。呢七個字就係「世襲復辟萬萬稅！」哈、哈！
孫柏文