下午茶時間，經過歷山大廈嘅Starbucks，於是順便行入去買件蛋糕。嘩，乜咁多人㗎，人聲鼎沸，仲嘈雜過陸羽，睇嚟呢間星巴克可能係最好生意嘅一間分店，星巴克嘅標準裝飾係有一張國際象棋枱，畀客人捉棋，但歷山星巴克內人頭湧湧，邊個人客敢膽喺呢度捉棋，必定俾其他人眼超超。
買完蛋糕，有人喝住。原來係賓架C與律師T兩人在此飲咖啡，蛇王半小時。太嘈嘞，請佢兩位揸住杯咖啡，行出去傾。傾咗一陣，手機聲響，原來係1010推銷長途電話，打電話去加拿大等地，每分鐘收費兩毫半，幾便宜噃。賓架C話：「平乜嘢呀，我用VOIP，成本近乎零，使乜用手機打長途。長途電話就快無利可圖，啲電話公司遲早放棄呢門生意。」真係今非昔比，想當年，與賓架C一齊做銀行Trainee，我哋做貸款部嘅，打電話最多，行政部喺我哋嘅電話貼上一張貼紙，寫住Thinkbeforeyoudial!一想起打長途電話，我哋就窒咗一窒。
賓架C諗番起，不禁大笑：「當年嘅香港電話公司有港英政府授予壟斷權，長途電話費貴到你肉赤，電話公司年年賺大錢，股價穩陣過滙豐。同今日比較，可謂有雲泥之別，退休人士在一九九六年後唔識走貨，認真慘情。」點解係一九九六年？因為港英臨走，還六十幾億畀大東電報局控制嘅香港電訊，買番個壟斷權，實行開放市場，於是電話費鬥個你死我活，電話公司厚利立即成為歷史。大東電報局精過鬼，收完一大筆擲煲費就立即部署鬆人，賣咗間佢知道唔會有前途嘅香港電訊，再賺多一次，卒之到咗二○○○年遇到PCCW，你情我願之下，高價脫手。套用陶傑嘅講法，此乃有遠見之英國人深謀遠慮，賺到盡，賺到最後一分鐘！留番畀你哋香港人公司喺冇肉食嘅電話市場砌個你死我活。
大東叻就叻咯，將件佢知道（好多香港人唔知道，仍然以為2000年香港電訊等於1990年香港電話）冇前途嘅公司及時賣出。不過冥冥中自有安排，大東將出售所得，投資其他公司，好似蝕清光咯！