新加坡一直畀人覺得係政府大晒、啲人民迫住做順民，個個都唔敢出聲，但八方今次就發現原來新加坡人好有「吉屎」、唔會向啲權貴低頭，勁過晒香港人多多聲！好似賣肉骨茶嘅「黃亞細」，佢哋啲夥計就唔會因為你新加坡外交部施壓、香港特首煲呔曾駕到而讓步，話知你乜水，總之收工就拉閘，過咗下晝兩點營業時間就唔做生意，而且仲有膽出嚟同記者踢爆你。仗義每多屠狗輩，黃亞細呢種不畏權貴嘅精神，八方真係要鼓掌致敬。
勢成香港團新景點
黃亞細雖然細細間，但喺新加坡好有名。話說當年有位潮州華僑黃美松，有一條肉骨茶秘方，用印尼胡椒加蒜加排骨加辣椒醬油文火煮成，由60年代賣到𠵱家，整整半個世紀，唔知幾多人專程搭車嚟飲。黃老先生有個女叫Mable，繼承阿爸間老字號；Mable個阿哥就係黃亞細，佢自立門戶，開咗黃亞細茶餐室，就係今次請煲呔食檸檬嗰間！嗱，各位旅遊界大哥，今後搞東南亞旅行團去星洲多一個景點，帶班團友去幫襯亞細哥，影番張相，食吓煲呔都食唔到嘅靚茶，保證受歡迎；不過記得兩點前到，唔好擺款。
睇見星洲華僑咁有腰骨，八方都好感觸。事關呢啲事肯定唔會喺香港發生，因為呢個國際都會太多世界仔，見到權貴，擦鞋都嚟唔切，點敢大聲向煲呔說不，請佢食閉門羹？唔驚秋後算賬都驚親疏有別啦！有行家同八方講，如果冇商標問題，一定會建議黃亞細喺香港開業，改名做「有骨氣」肉骨茶，等香港啲保皇黨、左派、商界，同埋啲被迫提名挺曾嘅選委自慚形穢，唔好淨係識聽中央吹雞、聽煲呔老點，冇晒原則。
要夠膽向北京說不
喺新加坡做反對派，代價好大，一定唔係「投機」，因為個政府好獨裁，傳媒又唔獨立，政府仲會迫害啲異見人士，但仍然有好似黃亞細呢啲小商人咁硬淨，唔賣賬。話晒香港比新加坡自由，香港人更加應該學呢種精神，繼續堅持爭取普選，夠膽向北京同煲呔大聲說不，咁先至有機會成功，你唔出聲做順民，就一定乜都冇。